Quierre el Dios que hay vivi kita con paz y alegria na paraiso tierra hasta para cuando!

Pero, baká hay preguntá tu, ‘Paquemodo se sucede?’ El Biblia ta habla que hay cumpli se por medio na Reino del Dios. Voluntad del Dios que todo el maga gente hay aprende acerca na su Reino y si cosa su proposito para kanaton.—Salmo 37:11, 29; Isaias 9:7.

Quierre el Dios que hay beneficia kita.

Igual na un amable tata que quierre el cosa de con todo bueno para na su maga anak, el diaton Tata na cielo ta desea que queda kita alegre hasta para cuando. (Isaias 48:17, 18) Ele ya promete que aquellos “quien ta hace el querer del Dios ta queda hasta para cuando.”—1 San Juan 2:17.

Quierre el Dios que sigui kita na su camino.

El Biblia ta habla que el diaton Creador quierre “enseña kanaton acerca na su maga camino” para puede kita ‘camina asegun na su direccion.’ (Isaias 2:2, 3) Ya organiza le “un nacion para na su nombre” para manda sabé el de suyu voluntad na entero mundo.—Maga Actividad 15:14, New World Translation.

Quierre el Dios que unido kita na adoranza con ele.

En vez de causa división entre na maga gente, el limpio adoranza con Jehova ta ayudá kanila para demonstra verdadero amor na uno y otro. (Juan 13:35) Quien man ta enseña ahora con el maga gente na entero mundo si paquemodo queda unido na servicio con Dios? Ta anima kame contigo sabé si cosa el contestacion na ayuda de este brosyur.