Gɔd want lɛ wi de na Paradays wit pis ɛn gladi at sote go.

Sɔm pipul go aks se, ‘Aw dat go apin?’ Di Baybul se na Gɔd in Kiŋdɔm go mek dat apin. Ɛn Gɔd want mek ɔlman lan bɔt di Kiŋdɔm ɛn di tin dɛn we i want du fɔ mɔtalman.—Sam 37:11, 29; Ayzaya 9:7.

Gɔd want lɛ wi ɛnjɔy wi layf.

Jɔs lɛk aw gud papa want mek gud tin mit in pikin dɛn, na so Gɔd want lɛ wi gɛt gladi at sote go. (Ayzaya 48:17, 18) Gɔd dɔn prɔmis wi se ɔl di wan dɛn we de ‘du wetin i want go de sote go.’—Jɔn In Fɔs Lɛta 2:17.

Gɔd want lɛ wi du wetin i want.

Di Baybul se Gɔd de ‘sho wi aw wi fɔ waka na layf’ so dat wi go ‘du wetin i want wi fɔ du.’ (Sam 25:4, 5) Gɔd dɔn ɔganayz “in yon pipul” dɛn so dat ɔlman na di wɔl go no wetin i want.—Di Apɔsul Dɛn Wok [Akt] 15:14.

Gɔd want mek wi wɔship am di sem we.

We pipul dɛn de wɔship Jiova di sem we de mek dɛn lɛk dɛnsɛf; i nɔ de mek dɛn skata. (Jɔn 13:35) Na udat dɛn de tich pipul dɛn ɔlsay na di wɔl aw fɔ gɛt wanwɔd? Wi want mek yu rid dis buk fɔ no di ansa.