Acani Cino Leza Akalonda?
E Leza akalonda twize twikale mu paradaise munsi mu mutende ni nsansa ku ciyayaya!
Pamwi mungati ‘Uzye icamusango wo-o cilicitika?’ E Baibolo ikati Uwufumu wa kwe Leza awuno wulilenga vyo-o vize vicitike, swinya e Leza akalonda ukuti awantu wonsinye wamanye wo-o Uwufumu na vino akalonda twakwikala.—Amalumbo 37:11, 29; Ayizeya 9:7.
E Leza akalonda ivintu vyatuzipila.
E Leza akalonda twawa ni nsansa ku ciyayaya, wulyanye vino Umukwasi walukundo akalonda awana wakwe wakwikala icete. (Ayizeya 48:17, 18) Walaya ukuti “wino akucita ukulonda kwa kwe Leza aliyikalilila ku ciyayaya.”—1 Yohani 2:17.
E Leza akalonda tuwapita mu nzila zyakwe.
E Baibolo yikati e Kelewula witu akalonda “ukutusambilizya vino akalonda twacita” pa kuti “twapita mu nzila zyakwe.” (Ayizeya 2:2, 3) Wateyanya “awantu wizina lyakwe” pa kuti ukulonda kwakwe kumanyikwe insi yonsinye.—Imilimo 15:14.
E Leza akalonda ukuti twawombela ponga pano tukumupepa
Ukupepa kwa cisinka kusipawunkanya awantu, lelo kukawalemenkanya ponga nu kulenga wakundana sana. (Yohani 13:35) Uzye awaweni wano wakusambilizya awantu insi yonsinye ivya kuwombela Leza ponga? Mukwai, tukumileenga ukuti muzane ivyasuko pano mukuwazya yo-o broshuwa.