Ndióxi̱ kúni̱ra si̱í ná kundooyó ta kooyó ndiʼi tíempo nu̱ú iin ñuʼú livi.

Sana ndákanixi̱níún ña̱yóʼo: “¿Á kivi xa̱a̱ña kooña saá?”. Ña̱ Biblia káʼa̱n káxiña xíʼinyó chi ña̱ nda̱a̱ koo ña̱yóʼo tá ná kaʼndachíñu Ndióxi̱. Ta kúni̱ra ndiʼi na̱ yiví ná kunda̱a̱-inina xa̱ʼa ña̱ kaʼndachíñura xíʼin xa̱ʼa ña̱ kúni̱ra koo chí nu̱únínu (Salmo 37:11, 29; Isaías 9:7).

Ndióxi̱ ndíʼi̱-inira xa̱ʼayó.

Tá kéʼé iin yivá na̱ va̱lí chi kúni̱ra vií ná kundoona, saá íyo Yiváyó Jehová kúni̱ra si̱íní ná kundooyó ndiʼi tíempo (Isaías 48:17, 18). Ta káchira “na̱ kéʼé ña̱ kúni̱ Ndióxi̱ na̱yóʼo kúú na̱ koo ndiʼi tíempo” (1 Juan 2:17).

Ndióxi̱ kúni̱ra ná kakayó yichi̱ra.

Biblia káchiña, Ndióxi̱ kúni̱ra “sánáʼa̱ra miíyó yichi̱ra, tasaá kakayó yichi̱ra” (Isaías 2:2, 3). Ta̱yóʼo ta̱vára iin ñuu na̱ kuniʼi ki̱vi̱ra ña̱ va̱ʼa ná nátúʼunna xa̱ʼa ndiʼi ña̱ kúni̱ra (Hechos 15:14).

Ndióxi̱ kúni̱ra iin káchi ná ndatakayó ndasakáʼnuyóra.

Na̱ kéʼé ña̱ káʼa̱n Ndióxi̱ kǒo táʼvi táʼanna, chi ndiʼina kúʼvi̱-inina xíni táʼanna (Juan 13:35). ¿Ndáana xíka sánáʼa̱ na̱ yiví ña̱ iníí ñuyǐví ña̱ iin káchi ná kachíñu ndiʼina nu̱ú Ndióxi̱? Káʼa̱nndi̱ xíʼún ná kaʼviún tutu yóʼo tasaá va̱ʼa kunda̱a̱-iniún xa̱ʼa ndáana kúúna.