Modimo o nyaka gore re phele ka mo go sa felego ka khutšo le lethabo lefaseng la paradeise!

Lega go le bjalo, o ka ipotšiša gore: ‘Seo se ka direga bjang?’ Beibele e re Mmušo wa Modimo o tla dira gore seo se kgonege, gomme thato ya Modimo ke gore batho ka moka ba ithute ka Mmušo woo le ka morero wa gagwe ka rena.—Psalme 37:11, 29; Jesaya 9:7.

Modimo o nyaka gore re holege.

Go etša ge tate yo lerato a kganyogela bana ba gagwe tše kaonekaone, Tatago rena wa legodimong o nyaka gore re hwetše lethabo la ka mo go sa felego. (Jesaya 48:17, 18) O holofeditše gore “yo a dirago thato ya Modimo o dula a le gona ka mo go sa felego.”—1 Johane 2:17.

Modimo o nyaka gore re sepele mebileng ya gagwe.

Beibele e re Mmopi wa rena o nyaka go “re ruta ditsela tša gagwe” e le gore re ka “sepela mebileng ya gagwe.” (Jesaya 2:2, 3) O rulagantše “batho ba leina la gagwe” gore ba tsebatše thato ya gagwe lefaseng ka moka.—Ditiro 15:14.

Modimo o nyaka gore re be batee borapeding bja gagwe.

Go e na le go aroganya batho, borapedi bjo bo sekilego bja Jehofa bo dira gore e be batee ka lerato la kgonthe. (Johane 13:35) Ke bomang bao lehono kae le kae ba rutago banna le basadi kamoo ba ka hlankelago Modimo ka botee? Re go laletša gore o hwetše karabo ka poroutšha ye.