Koht ketin kupwurki kitail en ahneki popohl oh peren nan paradais nin sampah kohkohlahte!

Ahpw mwein ke kin medewe, ‘Ia duwen met eh kak wiawi?’ Paipel mahsanih me Wehin Koht pahn kapwaiada met oh kupwuren Koht iei me aramas koaros en esehla duwen Wehio oh kupwure ong kitail.—Melkahka 37:11, 29; Aiseia 9:7.

Koht ketin kupwurki kitail en ale kamwahupatail.

Duwehte pahpa mwahu men me kin mwahuki dahme keieu mwahu ong nah seri kan, Samatail nanleng ketin kupwurki kitail en ahneki peren kohkohlahte. (Aiseia 48:17, 18) E ketin inoukihda me “me kin kapwaiada kupwur en Koht pahn momour kohkohlahte.”—1 Sohn 2:17.

Koht ketin kupwurki kitail en keid nan sapwellime ahl akan.

Paipel mahsanih me Sounkapikpatail ketin kupwurki “kasalehiong kitail kupwure, pwe kitail en keid nan sapwellime ahl akan.” (Aiseia 2:2, 3) E ketin koasoanehdi “aramas kei ong mwareo” pwe irail en padahkihong aramas koaros nin sampah duwen kupwure.—Wiewia 15:14, NW.

Koht ketin kupwurki kitail en miniminpene ni atail kaudokiong ih.

Sapwellimen Siohwa kaudok min sohte kin katohrepeseng aramas ahpw kin kaminiminirailkihpene limpoak mehlel. (Sohn 13:35) Rahnwet, ihs me kin padahkihong aramas wasa koaros duwen arail pahn papah Koht ni minimin? Se luke iuk ken esehla duwen met ni omw pahn doadoahngki kisin pwuhk wet.