Maganu gannate ikkitino uullara keerunninna hagiirrunni hegerera heeˈnammora hasiˈranno!

Ikkollana, ‘Kuni hiitto ikke ikkanno?’ yite xaˈmattoha ikkara dandaanno. Qullaawu Maxaafi, Maganu Mangiste tenne assitannota kulanno; qoleno Maganu, mannu baalunku hatte Mangisterenna hedosire rosanno gede hasiˈranno.—Faarso 37:11, 29; Isayyaasi 9:7.

Maganu woyyannonkere assinammora hasiˈranno.

Danchu anni oososira danchare hedannonte gede, iimi Anninkeno hegerera hagiidhinanni heeˈnammora hasiˈranno. (Isayyaasi 48:17, 18) Isi, ‘fajjosi assannohu hegerera heeˈrannota’ coyiˈrino.—1 Yohaannisi 2:17.

Maganu doogosi haˈnammora hasiˈranno.

Qullaawu Maxaafi, Kalaqaanchinke “harumasi haˈneemmo” gede “doogosi rosiisankera” hasiˈrannota kulannonke. (Isayyaasi 2:2, 3) Isi uulla woˈmate aana noo manni fajjosi afanno gede assate ‘suˈmisinni woshshamanno manna’ gamba assino.—Soqqamaanote Looso 15:14.

Maganu mittimmatenni gamba yine magansiˈnammosira hasiˈranno.

Yihowa halaalunni magansidhannori mereero babbadooshshu dino; roorenkanni insa addu baxillinni mitto ikkitino. (Yohaannisi 13:35) Yannankera Magano mittimmatenni magansiˈnanni gara base baalate meya labbaahura rosiissanni noori ayeooti? Tenne biroshere nabbabbe tenne xaˈmora dawaro afiˈratto gede koyinsoommohe.