Te Dios ya skʼan te yakuk xkuxinotik ta lamal kʼinal sok te ayuk stseʼelil koʼtantik ta jun nichimal kʼinal liʼ ta Balumilal.

Jaʼukmeto jichniwan ya awal ini: «¿Bin utʼil ya xkʼot ta pasel-abi?». Te Biblia jamal ya yal te jaʼ ta swenta te Ajwalinel yuʼun Dios te jich ya xkʼot ta pasele. Te Jpaswanej ya skʼan te yakuk snaʼbeyik skʼoplal spisil te ants winiketik ta swenta te Ajwalinel-abi sok ta swenta te bintik snopoj ya spas ta stojol te ants winiketike (Salmo 37:11, 29; Isaías 9:7).

Te Dios ya skʼan te lekuk ay te jkuxlejaltike.

Jich bitʼil jtul lekil tatil jaʼ ya skʼan te bin lek ta stojol te yal snichʼnabe, jich ya skʼan euk te jTatik te ay ta chʼulchan te ayuk sbujtsʼ koʼtantik ta sbajtʼel kʼinale (Isaías 48:17, 18). Melel jamal ya yal ta stojol «te machʼa ya spas te bin ya scʼan yoʼtan te Diose, sbahtel qʼuinal ya xcuxaj stuquel» (1 Juan 2:17).

Te Dios ya skʼan te yakuk xbeenotik ta beetik yuʼune.

Te Biblia ya yal te ya skʼan ya snojptesotik te Jpaswanej kuʼuntik ta swenta te «behetic yuʼun» swenta jich ya xbeenotik «ta tut behetic yuʼun» (Isaías 2:2, 3). Te Dios ay schajpanoj jun pueblo te ichʼbil yuʼun te sbiile swenta jich ya yichʼ naʼel ta swolol Balumilal te skʼanojel yoʼtan te Diose (Hechos 15:14).

Te Dios ya skʼan te junuknax ayotik ta yichʼel ta mukʼe.

Te smelelil religione maba ya xatiklan stukel te ants winiketike, melel ya yakʼ te junax ya x-ayinik ta swenta kʼuxul oʼtanil (Juan 13:35). ¿Machʼatik-a te yakik ta snojptesel te ants winiketik ta spisil nacionetik te junuknax ya x-abatinik ta stojol te Diose? Ta swenta te folleto ini, ya jkʼankotik te yakuk anaʼbey sujtib te jojkʼoyel ini.