Kaburut-on han Dios nga magkinabuhi kita ha kamurayawan ngan kalipayan ha paraiso nga tuna tubtob ha waray kataposan!

Kondi bangin ka magpakiana, ‘Paonan-o ito mahinanabo?’ An Biblia nasiring nga papahinaboon ito han Ginhadian han Dios, ngan kaburut-on han Dios nga an ngatanan nga tawo mahibaro mahitungod hito nga Ginhadian ngan han iya katuyoan para ha aton.—Salmo 37:11, 29; Isaias 9:7.

Kaburut-on han Dios nga an gimaopayi an mapahimulosan naton.

Sugad la nga hingyap han usa nga maopay nga tatay kon ano an gimaopayi para ha iya mga anak, karuyag han aton langitnon nga Amay nga magin malipayon kita tubtob ha waray kataposan. (Isaias 48:17, 18) Nagsaad hiya nga ‘an nagbubuhat han kaburut-on han Dios magpapadayon ha gihapon.’—1 Juan 2:17.

Kaburut-on han Dios nga maglakat kita ha iya dalan.

An Biblia nasiring nga karuyag kita ‘tutdoan’ han aton Maglalarang “han iya mga dalan” basi ‘kita maglakat ha iya mga agianan.’ (Isaias 2:2, 3) Nagtirok hiya “hin mga tawo nga magdadara han iya ngaran” basi maipasamwak an iya kaburut-on ha bug-os nga tuna.—Buhat 15:14, NW.

Kaburut-on han Dios nga magkaurosa kita ha pagsingba ha iya.

An limpyo nga pagsingba kan Jehova diri nagbabahin, kondi nag-uurosa ha mga tawo ha putli nga gugma. (Juan 13:35) Hin-o yana an nagtututdo ha mga tawo ha ngatanan nga dapit kon paonan-o urosa nga makakagsingba ha Dios? Gin-aaghat ka namon nga usisahon an baton hito pinaagi hini nga brosyur.