¿Baʼax u kʼáat Dios utiaʼal máak?
Dioseʼ u kʼáat ka kuxlakoʼon ich jeetsʼelil yéetel kiʼimak óolal tiʼ junpʼéel jatsʼuts Luʼum utiaʼal mantatsʼ.
Baʼaleʼ maʼ xaaneʼ techeʼ ka waʼalik: «¿Jach wa tu jaajil jeʼel u béeytal leloʼ?». Le Bibliaoʼ ku yaʼalik jach chéen u Reino Dios ken u béeykunte. Dioseʼ u kʼáat ka kaanbalnak tuláakal máak yoʼolal le Reinooʼ bey xan yoʼolal le baʼax ken u beet yoʼolal wíinikoʼ (Salmo 37:11, 29; Isaías 9:7).
Dioseʼ u kʼáat ka xiʼiktoʼon utsil yéetel ka yanaktoʼon kiʼimak óolal.
Jeʼex juntúul taatatsil jach yaan u yaabilaj yéetel u kʼáat ka xiʼik utsil tiʼ u paalaloʼobeʼ, k-Taata yaan teʼ kaʼanoʼ u kʼáat ka yanaktoʼon kiʼimak óolal utiaʼal mantatsʼ (Isaías 48:17, 18). Letiʼeʼ ku yaʼalik «le máax ku beetik baʼax u kʼáat Dioseʼ yaan u pʼáatal utiaʼal mantatsʼ» (1 Juan 2:17).
Dioseʼ u kʼáat ka xíimbalnakoʼon tu beeloʼob.
Le Bibliaoʼ ku kaʼansikeʼ, Dioseʼ u kʼáat u kaʼans tiʼ toʼon «u beeloʼob utiaʼal ka k-xíimbaltej» (Isaías 2:2, 3). Utiaʼal ka tsʼaʼabak ojéeltbil tiʼ tuláakal yóokʼol kaab baʼax u kʼáat utiaʼal máakeʼ, Jéeobaeʼ tsʼoʼok u yéeyik «junpʼéel kaaj bisik u kʼaabaʼ» (Baʼaxoʼob 15:14).
Dioseʼ u kʼáat junmúuchʼ ka k-adorarte.
Le jaajil religionoʼ maʼatech u jatsik le máakoʼoboʼ, baʼaxeʼ le nojoch yaabilaj yaan ichiloʼoboʼ le beetik u múuchʼ biskubaʼob (Juan 13:35). ¿Máaxoʼob kaʼansik le xiiboʼob yéetel le koʼoleloʼob tiʼ tuláakal yóokʼol kaab u adorartoʼob Dios junmúuchʼoʼ? Utiaʼal a wojéeltik máaxoʼobeʼ ilawil a xakʼaltik le folletoaʼ.