Dios racalaʼdxiʼ guibáninu sin gátinu, cadi chuʼ xiixa ni guchiiñaʼ laanu ne guibáninu nayecheʼ ndaaniʼ ti paraísu lu Guidxilayú.

Peru zándaca guiníʼ íqueluʼ: «Ximodo gaca nga yaʼ». Biblia na dxandíʼ zuni Reinu stiʼ Dios ni. Dios ni bizáʼ laanu racalaʼdxiʼ ganna guiráʼ xixé binni de Reinu ca ne xi naguixhe íquebe gúnibe para guiráʼ binni (Salmo 37:11, 29; Isaías 9:7).

Dios racalaʼdxiʼ chuʼnu galán.

Cásica racalaʼdxiʼ ti binni nachaʼhuiʼ chuʼ ca xiiñiʼ nazaaca la? zacaca racalaʼdxiʼ Bixhózenu ni nuu guibáʼ cadi gusaana de chuʼnu nayecheʼ (Isaías 48:17, 18). Laabe maʼ bidii stiidxabe: «Qué ziuu dxi initilú ni guni ni na Dios» (1 Juan 2:17).

Dios racalaʼdxiʼ sanu lu neza stiʼ.

Biblia na riuulaʼdxiʼ Dios gusiidiʼ laanu ca neza stiʼ ti ganda sanu lúcani (Isaías 2:2, 3). Laabe maʼ gudíxhebe chuʼ ti guidxi ni chiné labe ti ganna guiráʼ binni ni nabeza lu Guidxilayú xi naguixhe íquebe gúnibe (Hechos 15:14).

Dios racalaʼdxiʼ chuʼnu tobi si ora guni adorarnu laa.

Religión ni rusiidiʼ ni dxandíʼ qué ruxhéleni binni, sínuque racaneni laacaʼ chuʼcaʼ tobi si ne gannaxhiisaacaʼ (Juan 13:35). Tuu nga cusiidiʼ hombre ne gunaa de guiráʼ guidxi para chuʼcaʼ tobi si ora gúnicaʼ ni na Dios yaʼ. Cayuni invitardu lii gunibiaʼluʼ laacabe ra gúʼndaluʼ folletu riʼ.