Lit nge Saksi Jahwe si itandaindu? Piga-piga i bas kami banci saja teman sada kesainndu, sada dahin ntah pe teman sada kelasndu. Ntah pe, mungkin pernah kam ercakap-cakap kerna Pustaka si Badia ras kami. Ise nge kami situhuna, ras engkai makana ituriken kami kerna kiniteken kami kempak kalak si deban?

Kami manusia biasa. Kami rehna i bas erbage suku, bangsa, kebudayan ras status i bas masarakat. Piga-piga kami mbarenda ndalanken kiniteken sideban, janah lit ka nge si tang-tangna la tek nandangi Dibata. Tapi, ope lenga jadi Saksi, kami kerina mpelajari ajaren Pustaka si Badia alu megermet. (Perbahanen Rasul-Rasul 17:11) Kami setuju kempak kai si ipelajari kami, ras kami pe sekalak-sekalak mutusken guna nembah Dibata Jahwe alu cara si benar.

Kami pe nggejapken kai gunana erlajar Pustaka si Badia. Bali bagi kalak sideban, kami pe ngadapi erbage perbeben ras kelemahen kami sekalak-sekalak. Tapi, perbahan ndalanken ajaren Pustaka si Badia, igejapken kami kegeluhen kami reh ulina. (Masmur 128:1, 2) E me salah sada alasenna engkai maka ituriken kami kerina si mehuli si ipelajari kami i bas Pustaka si Badia.

Kami nggeluh sentudu ras prinsip-prinsip Pustaka si Badia. Prinsip-prinsip enda nampati kami gelah lebih ermeriah ukur ras lebih mehamat man kalak sideban, janah ndalanken biak-biak si mehuli bagi kinibujuren ras kiniulin. Prinsip-prinsip e ikut i bas njadiken masarakat si sehat ras mejingkat, janah ikut njadiken keluarga si harmonis ras si mehuli lagu langkahna. Perbahan tek kami ”la erndobah iakap Dibata manusia e”, kami ngenanami perkade-kaden arah erbage bangsa si ipersada alu kiniteken kami, si bebas i bas sangka-sangkan erkiteken suku ras politik. Payo kami manusia biasa, tapi i bas persadan, kami unik.​—Perbahanen Rasul-Rasul 4:13; 10:34, 35.

• I bas hal kai saja kin Saksi-Saksi Jahwe bali ras kalak sideban?

• Prinsip-prinsip kai nge si ipelajari Saksi i bas Pustaka si Badia nari?