Bin lèn Ghakwénta Yaweh Nsi ntu siʼi? Tsemoʼ netèt bag bʼa tsho ghambañ ndà, tse bin à bo num mfaʼ là ke tse bin a bo be ntsho ñwaʼni lo. Moʼndù bag yà ghebte zin nesoñ zin ntshob Nsi. Kuaʼ we ze bag be yi à? numke bag nke nsoñ mag ntswide tèt yàm à?

Bag bʼa mba bin nà. Bag fe à ntùm ba ntañngô nzenze mbèn nke mfaʼ mba zit faʼ lo. Tsemoʼ netèt bag naʼ mbʼa ntùm tshôssi ghua, tsemoʼ lo ke be bam Nsi. Bag be be Ghakwénta, ndù bag loʼ ngelañ neziʼde ntswide Ñwaʼni Nsi kuaʼ mebwô. (Mfaʼ Ghantum 17:11) Bag num mbam ju ze bag be nziʼde là mbèn ntshoʼ à yag tu neghamde Yaweh Nsi.

Bag be njù bin neziʼde Ñwaʼni Nsi. Mba mba we lo là, bag ghù tshag ngùtni bo tshag bot. Ndaʼndù bag be nkagtùn neke nze ntshùʼ Nsi njoñ léʼ fa, njen mbade ntùm yôg sage. (Yobkwi 128:1, 2) Yennà bʼa taʼ ju zʼa be ntènde yag neke ntshob mbwô tshu tse bag ziʼde ntùm Ñwaʼni Nsi là tsemoʼo.

Tshag mat yôg fe à Nsi. Tshen mat tsʼa fe ntùm Ñwaʼni Nsi là, be ngù bag tswe mebwô mbèn mfà nkuʼni tsemoʼo, ngù mat netsine mba bwôntù. Yennà num ngù mbe bag tswe mebwô mbèn mbe mbwô ghafaʼ ntùm njù, nke ntènde yag netswe netamde ntùm yag tunndà mbèn ngù mbwô mat. Mba bag lèn mbe Nsi keʼ be tôde là, bag bʼa ntùm taʼ tunndà netamde num bag ywèle ntùm njù fa, ke nke ndoʼ bag num nkùnkù mba tôde. Mba tà ndù bag bʼa mba tsemoʼ là, yag tunndà tum à tùʼ i.​—Mfaʼ Ghantum 4:13; 10:34, 35.

• Num zit bag Ghakwénta Yaweh Nsi be mba tsemoʼ à?

• Tsit mat tse Ghakwénta ziʼde ntùm Ñwaʼni Nsi à?