Ko Seedeeɓe Yahuwah njelo annduɗon ? Woɓɓe e amen ko kawtalɓe mon, ɓe gollidoton, maa ɗimmooɓe mon. No gasa men yewtii on fii Deftere Allah nden. On waaway men anndude ? Ko fii honɗun men wowlanta yimɓe ɓen fow fii gomɗinal amen ngal ?

Ko men kawtalɓe mon. Wonaa e leydi wootiri men iwri, wonaa men naamu gooto e wonaa men leɲol gootol. Woɓɓe e amen hari no e nder diina feere e woɓɓe hoolanooki Allah. Ɗoo yo men wonude Seedeeɓe Yahuwah, mo kala e amen jannguno Deftere Allah nden (Kuuɗe sahaabaaɓe ɓen 17:11). Meɗen hoolii ko men janngi kon. Ko ɗun waɗi, mo kala e amen no suɓii wonugol Seedeejo Yahuwah.

Janngugol Deftere Allah nden no wondani men e nafa. Wano yimɓe ɓen fow, Seedeeɓe Yahuwah ɓen no mari anndeeji e sonnjaaji. Kono huutorgol ko men janngi kon ka nder Deftere Allah, no wallude men no men accira kuuɗe amen bonɗe (Zabuura 128:1, 2, TMN). Ko ɗun waɗi si meɗen wowlande yimɓe ɓen ko men janngi kon ka nder Deftere Allah.

Needi amen ndin ko ka Allah iwri. Ndii needi wallay men no men jokkira laawol Allah ngol, teddina yimɓe ɓen, men wona fewuuɓe e moƴƴuɓe. Wallay men kadi no men heɓira pottal ka ɓeynguure amen e hoore laaɓal. Meɗen wa’i wa neene gootooɓe ɓayri meɗen hoolii ‘ fow no fota yeeso Allah. ’ Fii gere hakkunde leƴƴi e gere politiki seendataa men. Ko men kawtalɓe mon kono men waɗataa piiji wa adunayankooɓe. — Kuuɗe sahaabaaɓe ɓen 4:13 ; 10:34, 35.

• Ko honno Seedeeɓe Yahuuwah ɓen sertiri e luttuɓe ɓen ?

• Ko needi honndi Seedeeɓe Yahuwah ɓen heɓi ka nder Deftere Allah ?