Yi bani niba ŋa ke bi tie Jeova Siedinba? Li baa fidi ke bi tianba n tie yi yieninlieba, yi tuonsoanlieba bi yi cogibilieba. Li fidi mo ke yi bangi biibili yeni leni ba. Bi tie bee nibuoli? Beepo ke bi caa ki wangi bi niba ban daani yaala?

Ti tie nani bi niba kuli. Ti naa tie buolu yendo niba ba. Ti mabuoli, ti piama, leni ti bontienkaala naa ta-ta ba. Ti siiga nni, bi tianba den tie jaanbuoli toe niba, tianba mo naa den daani Jeova. Ama leni Jeova Siedo todima, yua kuli soangi o yama ki bangi biibili n yedi yaala. (Jesu Tondiba Tuona 17:⁠11) Ti tuo ga tin bangi yaala, ti ñani ti yama ki ba ŋoadi Jeova U Tienu.

Tin bangi biibili yeni pia tipo ti ñoadi. Ti pia a paka. Nani bi niba kuli, ti yen tude. Ama, tin moandi ŋua biibili tundi daali kuli yeni, ti nua ke ti yema ŋani ki cie kpiama. (Pisomi 128:1, 2) Lani n cedi ke ti wangi bi niba, tin bandi yaala biibili nni.

Ti ŋua U Tienu ñoamabona. U Tienu ñoamabona ye biibili nni. Tin ŋua laa ñoamabona yeni, ti yema mani, ti fangi bi niba, ti tie papiendanba leni niteginkaaba. U Tienu ñoamabona ŋoadima todi-​ti ke ti tie yaa niba n bua laafia. Ti diegu niba bua bi yaba, bi go pia bontienkaaŋanli. Jeova Siedinba bani ke “U Tienu ki gagidi bi niba leni biyaba”. Ŋanduna nni, i kaani kuli bi tie kpiiba, mi paadima ki ye bi siiga ba. Baa tin tie nani bi niba kuli yeni, ti tie yaa nibuoli n gagidi ti yula cain.—Jesu Tondiba Tuona 4:13; 10:34, 35.

• Beepo ke ti baa fidi yedi ke Jeova Siedinba tie nani bi niba kuli?

• Jeova Siedinba n bangi yaala biibili nni cedi ke bi tie bee nibuoli?