¿Kepaɨmeme pepɨwamaate Jehová Niukíeya memɨkuxaata? Xɨari ʼa ʼaurié temɨtitéi tepɨhɨɨkɨ, ʼahaamatɨa temɨteʼuximaya nutsɨ ʼahaamatɨa ʼetsikwera temayetéi; kauka xɨari ʼahaamatɨa Bibliatsíe teteniutixá. ¿Keane yeme tepɨhɨɨkɨ, metá títakɨ teuteri tetewakuxaxaatɨwa titatsíe temɨteʼerie?

ʼAhepaɨ tepɨʼaneene. Tatsata mepɨxuawe ʼuukitsi metá ʼuukari yɨɨkɨ meʼanenetɨ, hiipatɨ tumini mepexeiya hiipatɨtá hawaikɨ. Hiipatɨ yeiyarikate tepɨteʼuweiyakai, hiipatɨtá Yuutsitsíe tepɨkateʼeriekai; yatɨtɨ teyunaitɨ, taxexuitɨ taʼamaitɨ tepɨteʼanayexeiyaxɨa Yuútsi Niukíeya kemɨtikuʼɨɨkita (Hechos 17:11). Tita temɨtehetimaa tepɨteʼutanakeʼeri metá tepɨteʼanayewau: Jehová Yuútsi temayexeiyani.

Tita temɨteyutiʼɨɨkitɨwa Bibliatsíe pɨtatsipareewie. Meyunaitɨ teuteri waheepaɨ, haxa tepɨteʼanuyekɨká metá tepɨteʼukaʼeniwa; yatemɨtekahukɨ Yuútsi Niukíeya maine hepaɨ, hiikɨ tatuukaaritsíe matsi ʼaixɨ tepɨtehaukutei (Salmo 128:1, 2). Yamɨtatipareewiekɨ tatuukaaritsíe, ʼayumieme teuteri tepɨtewakuxaxaatɨwa tita temɨtehetimamaateke Bibliatsíe.

Yuútsi mɨtatiʼɨɨkitɨa hepaɨ tepɨtekahú. ʼƗkitɨarikate Bibliatsíe mayehú, pɨtatsipareewie ʼaixɨ temɨteheuʼeriekakɨ. Tsiere pɨtikuyuruwa teuteri ʼaixɨ temɨtewaxeiyani, temɨkatenawayani metá ʼaixɨ temɨteʼuʼiyaarini. Pɨtatsikupareewiwa ʼaixɨ temɨtexeiyariekakɨ hakewa temetiteitsíe, tamaremá wahaamatɨa ʼaixɨ temɨteheukutenikɨ, metá ʼaixɨ temɨteʼumamaatiwanikɨ. Tepɨtehaamate meyunaime «Yuútsi yaxeikɨ́a pɨtiwaxeiya». ʼAyumieme, naime kwieepatsíe taʼiwama mepɨtaama, yɨɨkɨ mekateyuxeiyatɨ metá ʼiitsɨɨkatari memanuyewawiwatsíe mekatepareewietɨ. Tseepá teuteri waheepaɨ temɨteʼanuyehú, teyunaitɨ tepɨyɨnɨʼɨ́ (Hechos 4:13; 10:34, 35).

• ¿Titatsíe teuteri waheepaɨ teteʼanuyehú Jehová Niukíeya temɨkuxaata?

• ¿Tita Bibliatsíe tetehetimamaate?