Katno ngut ki Nongsakhi U Jehobah phi ithuh? Katto katne na ngi, ngi lah ban dei ki para marjan, kiba ïatreilang ne ki para klas. Ne ngi la ju ïa kren bad phi shaphang ka Baibl. Ngi dei kiei bad balei ngi ïalap paidbah ïa ki jingngeit jong ngi?

Ngi long kum kiwei. Ngi wan na ki longïing bad ki dustur bapher bapher. Katto katne ngut na ngi mynshuwa ngi don ha kiwei pat ki niam, don pat ki bym shym la ngeit Blei. Hynrei shuwa ban long ki Nongsakhi U Jehobah, baroh ngi la pynlut por ha ka ban wad bniah ïa ki jinghikai jong ka Baibl. (Kam 17:11) Ngi la sngewthuh ba ki jinghikai ki long kiba shisha, bad hadien kata ngi sa rai hi dalade ban mane ïa U Blei Jehobah.

Ngi myntoi na ka jingpule Baibl. Kumba long baroh, ngi hap ban ïaleh ïa ki jingeh bad ïa la ki jingtlot. Hynrei, da kaba pyrshang ban bud ïa ki jinghikai jong ka Baibl ha la ka jingim ba man la ka sngi, ka jingim jong ngi ka la kham bha. (Salm 128:1, 2) Kata ka dei kawei na ki daw ba ngi ïa sam bad kiwei ïa kaei kaba ngi la tip na ka Baibl.

Ngi im katkum ki aiñ jong U Blei. Kumba la hikai ha ka Baibl, kine ki aiñ ki ïarap ïa ngi ban kyntiew ïa ka long-briew manbriew, ban burom ïa kiwei, bad ban long kiba sbun bad kiba leh hok. Ki ïarap ban long ki nongshong shnong kiba bha bad kiba kit khia ïa ka shnong ka thaw, ki pynshlur ïa ka ïing ka sem ban ïa tylli bad ban long kiba don akor. Kumba “U Blei um long uba ñiew shiliang khmat,” kumta ruh, ha kylleng ka pyrthei ngi long kum shipara ha kajuh ka jingngeit, khlem don ka jingsngewpher jaitbynriew ne ïa kano kano ka seng saiñ pyrthei. Wat la ngi dei ki riew paidbah, ngi kham pher na kiwei pat.​—Kam 4:13; 10:34, 35.

• Kumno ki Nongsakhi U Jehobah ki long kumjuh bad kiwei ki briew?

• Kiei ki jinglong babha kiba ki Nongsakhi U Jehobah ki la ïoh jinghikai na kaba pule ïa ka Baibl?