Bambangi ya Yehova yikua nge mezaba? Bayankaka kati na beto lenda vuanda bafinangani ya nge, to bankundi ya nge ya kisalu to ya kalasi. To beto mesololaka na nge masolo ya Biblia. Beto kele mpenza banani, mpe samu na yinki beto ketubilaka bantu nionso mambu yina beto kendiminaka?

Beto kele kaka lokola bantu nionso. Beto kele bantu ya buala mutindu na mutindu, bamputu na bamvuama. Bayankaka kati na beto bavuandaka na mabundu yankaka, mpe bayankaka vuandaka ndimina Nzambi ve. Kansi, mosimosi na kati na beto tadilaka ntete yandi mosi malongi ya Biblia mbotembote. (Bisalu 17:11) Beto ndimaka mambu yina beto longukaka, mpe na manima, mosimosi na beto ponaka kusambila Yehova Nzambi.

Kulonguka Biblia kenatinaka beto mambote. Beto diaka kekutanaka na mambu ya mpasi, mpe beto kevuandaka na mambu yina kekuamisaka beto lokola bantu nionso. Kasi, lokola beto kesalaka ngolo tosadila malongi ya Biblia na luzingu ya beto ya kilumbu na kilumbu, yau mebongisa mingi luzingu ya beto. (Nkunga 128:1, 2) Yakele mpe mosi ya mambu yina ketindaka beto beto tubila bayankaka mambu ya mbote yina beto melonguka na Biblia.

Beto kelandaka bansikudukusu ya Nzambi na luzingu na beto. Bansikudukusu yina Biblia kelongaka yau kesadisaka beto beto kukimona mbote, kuzitisa bayankaka mpe beto monisa bikadulu lokola kukuikama mpe kimpombo. Bikadulu yango kesadisaka beto tovuanda na mavimpi ya mbote, beto vuanda bantu yina mezaba kusala kisalu mbotembote, mpe beto vuanda na bumosi na dibuta mpe na bikadulu ya mbote. Lokola beto kendimaka ti ‘Nzambi keponaka bilungi ve,’ yau yina beto kele mpenza dibuta ya bampangi yina mekatuka na yinza mvimba. Beto kele ya kuvambana ve samu na bankanda to na politiki. Atako beto kele kaka lokola bantu nionso, beto kele dibuta mosi yina mefuanana na dibuta yankaka ve na yinza mvimba.​—Bisalu 4:13; 10:34, 35.

• Na yinki mambu Bambangi ya Yehova kele lokola bantu yankaka?

• Yinki bikadulu Bambangi ya Yehova kele na yau yina bamelonguka na Biblia?