Mbangi za Yave kwa ozeye? Akaka muna Mbangi za Yave mfinangani zaku, akundi a salu yovo akundi aku a sikola. Akaka muna yau nanga belongokanga yaku Nkand’a Nzambi. Aki nani kikilu i Mbangi za Yave? Ekuma tusamunanga lukwikilu lweto kwa wantu awonso?

Tu wantu nze ngeye. Twatuka mu makanda mawonso ye mpila zingu yaswaswana. Akaka muna yeto bakala muna mabundu maswaswana, akaka mpe ke bakwikilanga mu Nzambi ko. Kansi, una ke twakitukidi Mbangi za Yave ko, yeto awonso twavaulanga e ntangwa mu toma fimpa malongi ma Nkand’a Nzambi. (Mavangu 17:11) Twakwikila muna mambu twalongoka, i bosi konso muntu mu yeto wasola sambila Yave wa Nzambi.

Tubakanga nluta muna longoka Nkand’a Nzambi. Nze una divangamanga kwa wantu awonso, yeto Mbangi za Yave tumonanga e mpasi ye lutovoko lwa nitu. Kansi muna lemvokelanga e nkanikinu mia Nkand’a Nzambi muna zingu kieto kia lumbu ke lumbu, e zingu kieto kiasoba. (Nkunga 128:1, 2) Ediadi i diambu diantete dikutufilanga mu samuna kw’akaka mambu mambote tulongokanga muna Nkand’a Nzambi.

Nkanikinu mia Nzambi tulemvokelanga. E nkanikinu mia Nkand’a Nzambi mikutusadisanga mu kala e nkal’ambote, zitisa akaka, songa ziku yo vanga o wete. E nkanikinu miami misadisanga mpe mu yikakesa wantu a makanda mawonso ye misadisanga esi nzo bazinga kuna ungudi yo songa e fu yambote. Wau tuzeye wo vo ‘Nzambi kesianga mpambula ko,’ yeto Mbangi za Yave ke tuswaswanesanga makanda ko ngatu kuyisia mu mambu ma mbumba, tuna muna kintwadi kia wan’angudi mu nza yawonso. Kana una vo tu wantu nze ngeye, oyeto mu ungudi tuzingilanga.—Mavangu 4:13; 10:34, 35.

• Mbangi za Yave, mu nkia mambu bafwananene ye wantu akaka?

• Mbangi za Yave, nkia nkanikinu belongokanga muna Nkand’a Nzambi?