Le i Batumoni ba Yehova banga boyukile? Bamo bakokeja kwikala balondakani nobe, bengidi nobe, nansha bakwenu ba ku masomo. Nansha padi ketudi besambe nobe myanda ya mu Bible. Le bine twi bāni, ne mwanda waka tusapwilanga bantu byobya byotukulupile?

Twi bantu’nka na bonso. Twi batambe mu bibidiji bishileshile ne mu ngikadilo na ya bantu bonso. Bamo motudi batambile mu bipwilo bingi, bakwabo nabo kebadipo betabije mudi Leza. Inoko, kumeso kwa twikale Batumoni, twashilwile bidi kubandaula na katentekeji bufundiji bwa mu Bible. (Bilongwa 17:11) Twaitabije byobya byotwefundile, ne kutonga batwe bene kutōta Yehova Leza.

Tumwenanga mu kwifunda Bible. Netu tulwanga na makambakano ne na bukōkekōke bwetu pamo’nka bwa bantu bakwabo. Ino pa kutompa kulonda misoñanya ya mu Bible difuku ne difuku, twalumbulwile ngikadilo ya būmi bwetu mu muswelo utulumukwa. (Ñimbo ya Mitōto 128:1, 2) O mwanda buno i bubinga bumo bulengeja tusapwile bakwetu byobya byotwefundile mu Bible.

Tulondanga misoñanya ya Leza. Ino misoñanya, monka moilombwedilwe mu Bible, itulengejanga twikale biyampe na bantu ne kwibalēmeka, kadi twikale na kanye ne bampikwa budimbidimbi. Ilengejanga bantu bekale bakomo ku ngitu, bengila, kadi itononanga kisaka kikale mu bumo ne na mwikadilo muyampe. Byotukulupile amba Leza “kadipo na mboloji,” o mwanda twi batwele mu bu bana na bana bwa ku mushipiditu bwa ntanda yonso, bwampikwa kwisañuna mu tubila ne mu myanda ya politike. Nansha byotudi bantu’nka na bonso, ino twi babunde muzo wa bantu mwishile na yonso.—Bilongwa 4:13; 10:34, 35.

• Le Batumoni ba Yehova i bantu’nka na bonso namani?

• Le i misoñanya’ka ifundile Batumoni mu Bible?