Nu ja i menzumꞹge, ¿janzi testigo e Jehová gi pa̱rge? Bʼꞹma ka̱ra̱ testigo e Jehová ja i pɇpjige, bʼꞹma kja kolejio nu ja gi page ximi pojinu testigo. Bʼꞹma nutsʼkʼe a gui ñage ko dʼa testigo, bʼꞹma o xitsʼige pje mama ne Biblia. ¿Ja ga kjazgojme yo ri testigojme e Jehová ñe pjekja ri jichigojme yo ntee kʼo ri xørꞹjme kja ne Biblia?

Nutsʼkojme xo ri ntegojme nzakjatsʼkʼe. Texezgojme nrre nʼaño ja ri menzumꞹgojme. Nu ja ri jmurgojme poji bʼɇzo, nrrinxu ñe yo tsʼitrʼi. Ka̱ra̱ ntee kja yo testigo e Jehová kʼꞹ a mi pɇsʼiji o religión, bʼꞹnkʼo dya mi pɇsʼiji religión xo bʼꞹnkʼo mi manji dya mi bʼꞹbʼꞹ Mizhokjimi. Ma ro pjꞹrꞹjme ro xørgojme ne Biblia ro pjechigojme ja ga kjaa kʼo mamanu, kjanu ro kjagojme testigo e Jehová (Hechos 17:11). Ro nugojme kʼꞹ na kjuana kʼo mama kja o Jñaa Mizhokjimi, ga kjaba ro unꞹjme nguenrra kʼꞹ ma joo ma ro kjagojme ja ma nee Mizhokjimi Jehová.

Ri kjagojme kʼo mama ne Biblia. Nutsʼkojme xo ri pɇsʼijme nrrumꞹ nzakja kʼo pɇsʼi yo ntee, bʼꞹma bʼꞹbʼꞹ ma dya ri kjagojme kʼo na joo nange dya ri perfectogojme. Pero ne Biblia pjøxkꞹjme na punkjꞹ ra mimijme na joo, ngekʼua ri xørgojme o Jñaa e Mizhokjimi (Salmo128:1, 2). Ri negojme ke yo ntee xo ra minji na joo, ngekʼua ri jichigojme kʼo mama ne Biblia.

Ri ka̱rgojme na joo nangeje ri kjagojme ja ga mama e Mizhokjimi. Me ri sogojme na joo ma ri xørgojme ne Biblia, kʼo ri xørgojmenu pjøxkꞹjme ra kjagojme kʼo na joo. Nudya, dya kja na sʼozgojme ri respetaojme yo ntee, a ri jontejmedya, dya kjo ri ponbꞹjme o merio. Kʼo na sʼoo kʼo kjaa yo nrrinxu ñe yo bʼɇzo dya kja ri kjagojmekʼo ñe dya kja ri kjagojme chu̱ʼu̱. Ri ka̱ra̱jme na joo ko in pjamilia, xo ri pjøsʼꞹjme in chʼigojme ngekʼua ra tsjaji kʼo na joo. Ne Biblia mama ke e “Mizhokjimi dya juajnꞹ kjo ra sʼiya; ix na kjuana sʼiya texe yo ntee”. Ngekʼua texezgojme zo ri nʼaño in país ñe in jñiñigojme ri sʼiyagojme in dyokjojme. Zo ri ntegojme nzakja kʼo ñaja ntee, dya ri kjajme ñe dya ri minkʼojme nzakja angezeji (Hechos 4:13; 10:34, 35).

• ¿Pjekja ri mangojme ke yo ri testigojme e Jehová ñe nrrexe yo ntee nrre ri chjekjoji?

• ¿Ja ga mbøxkojme kʼo mama ne Biblia?