Nyuuva nnaacuwela Masaahiti a Yehova akavi? Pooti ukhalaka wiira haavo mmwaattamananneenyu, nonsomaneenyu awula nonvaraneenyu nteko khanle Saahiti a Yehova. Awula pooti ukhalaka wiira nyuuva nhotoko umoopana mwaha wo mbiiblyani. Masi naapani hiivano, ni kontha isiyani ninaahimyereehu akhunanihu ile inkupaliihu?

Hiivano khaninvirikana naatthu akhwaawe. Hiivano naatthu o maloko ni makhalelo oovirikana. Nhina mphwinko wo Masaahiti a Yehova ahaavo khalayi yaari ittiini cikhwaawe awula khayaamini wiira Nluku haavo. Masi nihinaaya ukhala Masaahiti a Yehova, nihiivaha ukati wiira nisome sana-saana ile ineetthucihaaya Ibiiblya. (Miteko 17:11) Nihokupali citthu ciitthucileehu ni niholakela unswalela Yehova Nluku.

Ninaaphwanyera ifayita usoma wihu Ibiiblya. Toko atthu akiina, ni hiivano anaanikhumelelaka masakha ni cihaavo citthu cinnirikarika. Masi nihoonenela wiira namananihaka uvarela nteko ikano co mbiiblyani khula mahuku ninaakhalana ukumi womaana. (Isaalimu 128:1, 2) Iyo phiitthu imoca inniiriha waahimyera akhunanihu citthu cineetthuceehu mbiiblyani.

Ninaavarela nteko ikano ca Nluku. Ikano cineetthucihaaya Ibiiblya, cinaaphwanyiha ukumi womaana ni cinaanikurumica waahisimu akhunanihu, ni ukhalana makhalelo omaana toko ukhuluvelya ni unamaana. Nnyo ikanonnyo cinawaakavihera atthu ukhalana ukumi womaana, uvara miteko saana, uwaataaniha watthokoni ni ukhalana meettelo omaana. Ninaakupali wiira “Nluku khanthanla ikhapila”, phimaana mphwinkweehu wo mayamunna unaaphwanyannya ilapo cotheene, woohithanyanaciya ni woohikelakela isiyaasa, otheene ninaamini citthu cimocaaru. Unookhalaru wiira hiiva naatthu khampa atthu akhwaawe, makhalelweehu anaavirikana naayo.—Miteko 4:13; 10:34, 35.

• Isiyani inwiiriha Masaahiti a Yehova uhivirikana naatthu akhwaawe?

• Ikanoni comaana Masaahiti a Yehova ciitthucilyaaya nlattu woosoma Ibiiblya?