Uzye mwamanya Inte zya kwe Yehova wanga? Wamwi pamwi awina mupalamano winu, pamwi mukawomba nawo, pamwi mukasambilila nawo ku sukulu. Mpamwi twalanzyanyapo namwemwe ivya mu Baibolo. Nomba uzye swe waweni, swinya acani cino tukanenelako wanji vino twazumilamo?

Swe wantu ndi vino mwemwenye. Twafuma mu vikulilo ivipusane pusane swinya ni mikalile yitu nye nayo yapusana pusana. Swe wamwi twapepanga kunji swinya wamwi tutazumizile namwe Leza nye. Lelo swensinye pano tutani tuwe swe Nte zya kwe Yehova twasambilizile nu kwivwicisya vino Baibolo ikasambilizya. (Imilimo 17:11) Twasuwizile vino twasambilizile nu kupingulapo ukupepa e Yehova Leza.

Vino tukasambilila mwe Baibolo vikatwavwa. Swe Nte zya kwe Yehova naswenye tukapita muntazi swinya cila muntu wawa na muno watonta. Lelo ukwelezya na maka ukukonka ivisinka vya mu Baibolo mu wumi witu kwalenga imikalile yitu ukuzipilako. (Amalumbo 128:1, 2) Co-o acino calenga ukuti twanenako na wanji ivizima vino tukasambilila mu Baibolo.

Tukakonka vino Leza akatusambilizya. Vino tukasambilila mwe Baibolo vikatwavwa ukuwa awantu wazima, vikalenga twacindika wanji nu kuwa awacisinka swinya awa cikuuku. Ivisinka vya mu Baibolo vikalenga twawa nu mwezo wuzima ku wantu, ukwavwana nu kulemana mu lupwa swinya vikatwavwa ukuwa ni miwele mizima. Swe Nte zya kwe Yehova tukalola ukuti swe lupwa longa amuno twamanya ukuti e “Leza atawa na kapatulula.” Nanti acakuti tutapusana na wantu wanji, kwawa cino calenga ukuti tuwe swe wantu awayiwele.—Imilimo 4:13; 10:34, 35.

• Acani cino tungalandila ukuti Inte zya kwe Yehova wawavye ndi vino awantu wanji?

• Avizima ci vino wa Nte wakasambilila mu Baibolo?