¿Keskij Jehová itlajtoltemakauaj tikinixmati? Uelis sekij itstokej mokalnechka, o uelis intekitij o inmomachtiaj sansejko, o uelis mitspouilijtokej tlen kiijtoua Biblia. Uajka, ¿ajkia inijuantij Jehová itlajtoltemakauaj? ¿Kenke tepouiliaj tlen kineltokaj?

Inijuantij nojkia kej nochi maseualmej. Ipan ni religión itstokej tlakamej uan siuamej tlen kampa ueli euaj, sekij tlapijpiaj uan sekij amo. Sekij itstoyaj ipan seyok religión uan sekij amo kineltokayayaj tlaj itstok toTeotsij. Yeka, kema mochijkej Jehová itlajtoltemakauaj achtoui kikajkej tonali uan kiampa kuali momachtijkej tlen tlamachtia Biblia (Hechos 17:11). Kineltokakej tlen kinmachtijkej uan teipa ininselti kitlapejpenijkej kiueyichiuasej toTeotsij Jehová.

Kikauaj ma kinpaleui tlen momachtiaj ipan Biblia. Inijuantij nojkia kipiaj kuesoli uan mokuapolouaj kej nochi maseualmej, maske kej nopa pano, kichiuaj kampeka moyakanasej ipan ininnemilis ika toTeotsij itlanauatiljuaj, ni kinpaleuijtok nama tlauel kuali ma itstokaj (Salmo 128:1, 2). Nojkia kinyololinia ma tepouilikaj nopa kuali tlamachtili tlen momachtijtokej ipan Biblia.

Kikauaj ma kinyakana toTeotsij itlanauatiljuaj. Ni tlanauatili tlen uala ipan Biblia, kichiua kuali ma kiyolmatikaj. Kinyololinia ma tetlepanitakaj, amo ma tekajkayauakaj uan ma techiuilikaj tlen kuali. Kinpaleuia amo ma kipiakaj kokolistli uan kuali ma tekitikaj, nojkia kichiua ma itstokaj sansejko ininuaya ininchampoyouaj uan amo ma momekatikaj. Kimatij nelia “toTeko axtechchikoiknelia”. Yeka maske kampa ueli euaj moikneliaj kej iknimej, amo mokalakiaj ika política yon amo mokualankaitaj maske sekij chipaktikej uan sekij amo. Uan maske inijuantij kej nochi maseualmej, amo onka seyok religión kampa itstokej kej inijuantij (Hechos 4:13; 10:34, 35).

• ¿Kenke Jehová itlajtoltemakauaj nojkia kej nochi maseualmej?

• ¿Tlake momachtijtokej ipan Biblia tlen tlauel ipati?