¿Kanachi itaixpantijkauan Jiova tikonixmati? Tisekimej xa tinemij kampa tejuatsin tionnemi, oso titekitij kampa tejuatsin tiontekiti oso timosenmachtiaj; xa mouan titajtouanij ika Biblia. ¿Tiakonimej yekmelauj, uan keyej tikteixmatiltiaj tein tikneltokaj?

Tinemij kemej nochin taltikpakneminij. Touan pouij takamej uan siuamej akin kayomej itech tataman xolalmej uan kipiaj tataman nemilis. Tisekimej tikpiayaj se taneltokalis, oksekin amo titaneltokayaj; sayoj ke achtopa ke timochiuaskiaj tiitaixpantijkauan Jiova, tinochin tikxelojkej tepitsin totonaluan uan timomachtijkej ika nejmachkayot tein tamachtia Biblia (Hechos 17:11). Tikselijkej tein timomachtijkej uan ompa tikixtalijkej tisejsemej tikueyichiuaskej Jiova Dios.

Tikseliaj nepaleuil keman timomachtiaj Biblia. Kemej nochin taltikpakneminij, tikpiaj kuejmolmej uan seki taman tein techtapololtia; sayoj ke kemej timochikauaj nochipa timonejnemiltiskej kemej tanauatia Biblia, okachi kuali tinemij (Salmo 128:1, 2). Yejua ika, nejin se taman tein ika tikintapouiaj taltikpakneminij tein kuali timomachtianij itech Biblia.

Tiktayekanaltiaj tein Dios technauatia. Nejin tikajsij itech Biblia, uan techpaleuia maj kuali timomachilikan. Uan no, techyolchikaua maj tikinpoujkaitakan taltikpakneminij uan maj timelaujkej uan tikualtakamej. Techpaleuia maj tichipaujkej uan maj titapaleuikan kampa tinemiskej, maj timoyekuikakan iniuan tochankauan uan maj tichipaujkanemikan. Titakuaujtamatij ke “Totajtsin Dios amo [kinchichikotasojta] in tagayot”. Yejua ika, ueli tikijtouaj ke totaneltokalis techsentilia iniuan akin okseko kayomej, uan amo timoxelouaj porin titatamamej nion porin tataman tekiuajyomej techixyekanaj. Maski titamatij kemej oksekin, tipouij kemej yeskia itech se xolal, uan amo onkak okse kemej nejon (Hechos 4:13; 10:34, 35).

• ¿Toni kipiaj itaixpantijkauan Jiova ijkon kemej okseki taltikpakneminij?

• ¿Toni tamachtilismej tikselianij itech Biblia?