Mo hĩnga Atɛmwɛ tɛ Yehova kɛ? Ngoi mɛ ndɛ ambeni ka popo tɛrɛ la ka gunda mɔ, akwa mɔ ti lɛ kwa, bere ti kalasi. Bere e na mɔ e tɛnɛndó tɛnɛ na ndo Ngbangɔ. Edu nvɛ̃ni ana, e ndo fa nga na azi zu aye mɛ e ndo ye na lo nɛ?

Edu nga ma azi zu. E na ase du ndɛ ndɛ ndɛ, akotazi nga na awa yɛlɛ. Ala mɛ ndɛ ge popo tɛrɛ e ndó ka ya asambela ndɛ ndɛ ndɛ, ambɛni ta ndo yendó ya Nzapa dazu ma. Uzu ti tingɔ Atɛmwɛ ko, e mundó ngoi ti bangɔ na seni nvɛ̃ni ye mɛ Ngbangɔ ndo ha. (Awa Pangɔ Kwa 17:11) E yendó ye mɛ e manda, ni la e nvɛ̃ni esala vɔrɔngɔ Yehova Nzapa.

Elwa mbana gɛrɛ ti mandangɔ Ngbangɔ. Ma se tɛ azi zu ko, e ndo tengbi na kpengba lo, e ndo yu nga ndo. Ngoi mɛ e ndo kpã andia ti Ngbangɔ na kwa ka ya du tɛ e ti lá kwɛ́ ko, ni ndo lɛkɛ se du tɛ e ma wo ma. (Nzembo 128:1, 2) Kɔi ti aye mɛ ndo to e ya e fa na azi mɛ ndɛ aye mɛ e manda ka ya Ngbangɔ la.

E ndo tɔndɔ ndia tɛ Nzapa ka ya du tɛ e. Andia ni ko, ndo lo ka ya Ngbangɔ, ndo za e ya edu nzɔ̃ni, e tɔndɔ nga azi mɛ ndɛ, e fa nga ase liye nga ma lingɔ nzɔ̃ ye bere nzɔ̃ bɛ. Ndo za nga e ya edu na nzɔ̃ tɛrɛ, edu azi mɛ ndo li nzɔ̃ kwa ko edu ndoni kɔi ka nda sewa nga na se liye ti nzɔ̃ni. E hĩnga ya “azi zu ka lɛ Nzapa bo kwɛ kɔi,” ni la edu nda sewa tɛ ayata mɛ alo ka ya kɔdɔrɔ zu, loyengɔ tɛ e bo kɔi, ta pɔrɔ tɛrɛ, kɔdɔrɔ bere poloso ndo kangbi popo tɛrɛ e ma. A bɛ se edu nga ma azi zu ko, ta nda sewa mɛ ndɛ ge tise mɛ alengbi na tɛ e da ma.​—Awa Pangɔ Kwa 4:13; 10:34, 35.

• Aye mɛ Atɛmwɛ tɛ Yehova adu na ni kwɛ kɔi na azi zu nɛ?

• Ase liye ti nzɔ̃ni mɛ Atɛmwɛ manda ka ya Ngbangɔ nɛ?