¿Ke̱ski yej tajto̱lmoya̱waj de Jehová tiki̱xmati? Anka sekin de nejeme̱n nicha̱ntitokej ina̱ de mocha̱n, tisentekipanowaj o timosenmachtiáj, anka sekin biáj titajtojkej de Itajto̱l Dios. ¿A̱ʼ yéj nejeme̱n wan té íga nitajtowaj wan seuʼmej de yej nimomachtiáj pan Itajto̱l Dios?

Nejeme̱n ken nochimej. Wan nejeme̱n onokej tajta̱gamej wan siwa̱tkej yej wi̱tsej de nochi a̱ltepe̱mej wan sekin kipiáj tomin wan sekin akipiáj. Sekin de nejeme̱n nonoyaj pan se̱ religión, wan seuʼmej aki̱xmatiáj Dios; pero achto iga manimochi̱wakan tajto̱lmoya̱waj de Jehová, nimoye̱ʼmachtijkej yej kine̱xtiá Itajto̱l Dios (Hechos 17:11). Tikye̱ʼitakej yej timomachtijkej wan de ompa tiktapejpenkej matikweychi̱wakan Jehová Dios.

Te̱pale̱wiá yej timomachtiáj pan Biblia. Ijko̱nsan ken nochimej, nejeme̱n nimoyo̱lmiktiáj wan nikpiáj pecado; pero iga nimotekitiliáj nochipa iga manikchi̱wakan ken kijtowa Biblia, iní̱n kichi̱wa iga maniye̱ʼonokan (Salmo 128:1, 2). Inó̱n iga nitajtowaj wan seuʼmej de tejté̱ yej ye̱kti yej nimomachtijkej pan Biblia.

Tinemij ken te̱nextiliá Dios. Pan Biblia te̱nextiliá kén matinemikan, iní̱n kichi̱wa matimomachi̱likan ye̱kti. Wan no̱ te̱pale̱wiá iga matimoye̱ʼwigakan wan seuʼmej wan amo matitachtekikan sinoke matikchi̱wakan yej ye̱kti. Te̱pale̱wiá iga matipa̱kikan wan matikpale̱wi̱kan toa̱ltepe̱ʼ wan iga tofamiliaj masekantito wan matiye̱ʼnemikan. Tikmatij iga «Dios ayá̱ kineki sékinsan». Inó̱n iga nonokej pan nochi Ta̱jli, wan aunke niwi̱tsej de miak a̱ltepe̱mej nonokej sekan. Aunke nejeme̱n kensan nochimej, ayá̱ onoʼ seuʼ a̱ltepe̱ʼ ken nejeme̱n (Hechos 4:13; 10:34, 35).

• ¿Té̱ íga yej tajto̱lmoya̱waj de Jehová ijko̱nsan ken nochimej?

• ¿Te̱ te̱nextiliá Itajto̱l Dios iga matikchi̱wakan?