O tseba Dihlatse tša Jehofa tše kae? Ba bangwe ba rena re ka ba re le baagišani ba gago, re šoma le wena goba re tsena le wena ka klaseng. Goba re ka ba re ile ra boledišana le wena ka Beibele. Ge e le gabotse re bomang, gona ke ka baka la’ng re bolela phatlalatša ka ditumelo tša rena?

Re batho ba tlwaelegilego. Re tšwa ditlogong tše di fapafapanego le maemong a sa swanego setšhabeng. Ba bangwe ba rena re be re le madumeding a mangwe, mola ba bangwe ba be ba sa dumele go Modimo. Lega go le bjalo, pele re eba Dihlatse, ka moka ga rena re ile ra tšea nako re hlahloba dithuto tša Beibele ka kelohloko. (Ditiro 17:11) Re ile ra dumelelana le seo re bego re ithuta sona, ke moka ra ikgethela go rapela Jehofa Modimo.

Re holwa ke go ithuta Beibele. Go swana le motho yo mongwe le yo mongwe, re swanetše go lebeletšana le mathata gotee le mafokodi a rena. Re kaonefaditše boemo bja bophelo bja rena kudu ka go leka go diriša melao ya motheo ya Beibele bophelong bja rena bja letšatši le letšatši. (Psalme 128:1, 2) Leo ke le lengwe la mabaka ao re botšago ba bangwe dilo tše dibotse tšeo re ithutilego tšona Beibeleng.

Re phela ka ditekanyetšo tša Modimo. Ditekanyetšo tše, go ya kamoo di rutwago ka gona ka Beibeleng, di kgothaletša bophelo bjo bobotse le go hlompha batho ba bangwe, gotee le dika tše swanago le potego le botho. Di kgatha tema tabeng ya gore setšhabeng go be le batho bao ba phetšego gabotse le bao ba nago le mohola, gomme di kgothaletša botee bja lapa le boitshwaro. Ka ge re kgodišegile gore “Modimo ga a bebe sefahlego,” re karolo ya borwarre bja moya bjo e lego bja ditšhabatšhaba e le ka kgonthe, bjo bo se nago mapheko a botšhaba le a bopolotiki. Gaešita le ge re le batho ba tlwaelegilego, re karolo ya batho ba moswananoši.—Ditiro 4:13; 10:34, 35.

• Dihlatse tša Jehofa di swana ka eng le batho ba bangwe?

• Ke ditekanyetšo dife tšeo Dihlatse tša Jehofa di ithutilego tšona ka go ithuta Beibele?