Kjanst du eenje von Jehova siene Zeijen, veleicht von de Oabeit, von enne School ooda wiels daut diene Nobasch sent? Veleicht haft mol wäa von ons met die von de Schreft jerät. Oba wäa sent wie soo rajcht, un wuarom räd wie met aundre von onsen Gloowen?

Wie sent gaunz jeweenelje Menschen. Wie komen von veschiedne Velkja häa un sent uk veschieden oppjewossen. Eenje von ons haben ea eenen aundren Gloowen jehaut ooda haben äwahaupt nich aun Gott jejleeft. Oba ea wie eent von Jehova siene Zeijen jeworden sent, hab wie ons de Lieren ut de Schreft goot unjastonen (Aposteljeschicht 17:11). Wie haben daut aunjenomen, waut wie jelieet haben, un sent ons eenich jeworden, Jehova Gott to deenen.

De Schreft to studieren halpt ons sea. Soo aus jieda eena hab wie uk onse Trubbels un Fäla. Oba wiels wie ons emma proowen no de Schreft to rechten, jeit ons daut em Läwen väl bäta (Psalm 128:1-2). Dit es eene Uasoak, wuarom wie met aundre von daut goode räden, waut wie ut de Schreft jelieet haben.

Wie läwen no daut, waut Gott fa rajcht talt. No de Schreft to läwen halpt eenem, daut eenem daut scheen jeit, daut eena aundre achten deit un daut eena opprechtich un leeftolich es. Daut halpt eenem uk, een bätra un flietjara Mensch to sennen, enne Famielje veeent to sennen un sikj rajcht to vehoolen. Wie weeten, “daut Gott manke Menschen kjeen Unjascheet moakt”, doawäajen sent wie ons oppe gaunze Welt eenich aus Breeda un Sestren, endoont woo veschieden wie sent. Wie sent gaunz jeweenelje Menschen, oba doch een sea besondret Volkj (Aposteljeschicht 4:13; 10:34-35).

• En waut fa Stekjen sent Jehova siene Zeijen soo aus aundre Menschen?

• Waut haben Jehova siene Zeijen ut de Schreft jelieet?