¿Aica Jehóvap testigusninta ’rejsinqui? Huaquin nockaycumanta vecinusniyqui cayta atiycu, ckamuan llamcaycu, compañerusniyqui escuelamanta caycu o na ’rimaraycu ckamuan Bibliamanta. ¿Picunas caycu? ¿Imajchus tucuyuan creesckaycumanta ’rimaycu?

Túcuy persunas ina caycu. Nockaycupi tárej ’rinqui ckaris y huarmis ashca lausmanta y túcuy layasta. Huaquin suj religiunta ápej caraycu y sujcuna Yayapi mana créej caraycu; pero manáraj Jehóvap testigusnin cas, túcuy nockaycu tiemputa sorckoraycu Biblia yachachisckanta estudianaycúpaj y unanchanaycúpaj, mana apuranacus (Hechos 17:11). Túcuy aprendesckaycuta aceptaraycu y chaymanta sapa suj nockayculla ajllaraycu: Yaya Jehovát adorayta.

Biblia yachachisckanta aprendeyta yanapaaraycu. Túcuy ina, problemasta y defectosta apiycu. Pero causayniycupi, esforsacuycu Biblia nisckanta ’ruayta y chayna causayniycu ashcata allichacora (Salmos 128:1, 2). Chayraycu tucuyta ’rimapuycu alli imastismanta ima Bibliamanta aprendesckaycút.

Yaya nisckanta casucuycu. Túcuy Biblia yachachiasckaycuta ashcata yanapaaraycu cusisckas canaycúpaj. Yachachiaycu respetuosos canaycúpaj, honestos y allis tucuyuan. Yanapaaycupas allít causanaycúpaj, alli llamcadores canaycúpaj máypij cachun tias y familia ina astaan cuscayasckas tianaycúpaj. Convencesckas tiaycu ima Yayápaj túcuy sujlla laya caycu. Chayraycu, túcuy ashpapi huauckes y panas espiritualesta apiycu, mana importas maymanta cancu o ima laya personasmanta cancu. Aunque sujcuna personas ina caycu, sujlla pueblu cuscayasckas caycu (Hechos 4:13; 10:34, 35).

• Jehóvap testigusnin, ¿imapi túcuy persunasuan llijchacuycu?

• Biblia yachachisckanta, ¿imaina causayniycupi yanapaaraycu?