Ati Yihowa Farciˈraasine giddo meˈˈe egennootto? Ninke giddo mitu ollaakki ikkitara dandiitanno, woy ate ledo mitteenni loossannore woy rossannore ikkitara dandiitanno. Woy ate ledo Qullaawu Maxaafire hasaamboommoha ikkara dandaanno. Isi ninke ayeooti? Ammananke faajjete fulle sabbankeemmohu mayiraati?

Ninkeno wolu manni gedeereentilla. Addi addi gosa giddonni, hattono addi addi gari heeshshonni gamba yinoommoreeti. Ninke giddo mitu konni albaanni wole ammaˈno harunsitannoreeti, wolootu kayinni Maganu noota ammantannokkireeti. Ikkollana, Yihowa Farciˈraasine ikkinammora albaanni, ninke baalunku Qullaawu Maxaafi yaannore seekkine xiinxallinummo. (Soqqamaanote Looso 17:11) Ronsoommo coyi ammansiisinke, hakkiinnino Magano Yihowa magansiˈrate uminkenni doodhinoommo.

Qullaawa Maxaafa xiinxallanke kaaˈlitinonke. Wolu manninte gede, ninkerano mitiinsannori iillannonke, hattono uminke laanfe noonkereeti. Ikkollana, Qullaawu Maxaafi amaale harunsanke, heeshshonke lowonta woyyeessitinonke. (Faarso 128:1, 2) Qullaawu Maxaafinni ronsoommoha dancha coye mannaho kulleemmohu mittu korkaati, wolootuno heeshshonsa woyyeessidharaati.

Heeˈneemmohu Maganu seerinniiti. Qullaawu Maxaafi rosiisannonte gede, kuni seeri fayyuulle ikkine heeˈnanni gede, manna ayirrinsanni gede, hattono ammanamanna danchumma lawinohu baxisanno akati heeˈrannonke gede kaaˈlanno. Hattono dagoomu giddo fayyunna kaaˈlanno manni heeˈranno gede, qoleno maatete giddo mittimmanna amanyootu heeˈranno gede kaaˈlanno. ‘Maganu godowa hosannokkiha’ ikkinota ammanneemmo daafira, sirchunna poletiku babbadooshshi nookkita, hattono ammanatenni mitte ikkitinota alamete doyicho maate ikkinoommo. Mitto mitto laˈniro wolu manni gedeereentilla, mitteenni gamba yine kayinni baxxino manna ikkinoommo.—Soqqamaanote Looso 4:13; 10:34, 35.

• Yihowa Farciˈraasine wolu manni ledo mitto assannonsahu maati?

• Yihowa Farciˈraasine Qullaawa Maxaafa xiinxallansanni hiittoo seera rossino?