Ka Mbashiada mba Yehova u me u fe? Alaghga mbagenev ken a vese ka mba wan ndor a we shin mba u eren tom a ve imôngo, shin u ze makeranta a ve imôngo yô. Gayô alaghga se vande lamen a we ken Bibilo acin imôngo. Ka unô ior jim se lu, shi se mba pasen ior akaa a se ne jighjigh a mi la ken igbar sha ci u nyi?

Se mba er ior mbagenev nahan. Se due sha ajiir kposo kposo, mbagenev mba a kwagh a ve, mbagenev mba a mi ga. Se mbagenev yange se zaan ukwaghaôndo kposo kposo, mbagenev di na Aôndo jighjigh ga. Nahan kpa, cii man se hingir Mbashiada yô, se cii yange se tôô shighe se time sha atesen a ken Bibilo zulee. (Aerenakaa 17:11) Yange se lumun a kwagh u se hen la, nahan se tsua a ishima yase ser se civir Yehova Aôndo.

Se mba zough a mtsera sha u henen Bibilo. Se mba nôngon a mbamzeyol kua mbamyina asev, vough er mbagenev nahan. Kpa er se nôngon ser se dondo atindiakaa a ken Bibilo ken uma wase ayange ayange yô, uma wase doo je zua ga. (Pasalmi 128:1, 2) Ka ityôkyaa igen i i ne ve se pasen mbagenev akaa a dedoo a se hen ken Bibilo je la.

Se mba eren akaa a a doo Aôndo ishima la. Er i tese ken Bibilo nahan, akaa a a doo Aôndo ishima ne, nga a wase se u lun ken mkpeyol shi nan mbagenev icivir, shi lun a aeren amba er erdoo man inja i mimi nahan. Akaa a doon Aôndo ishima ne nga a wase se se za ikyura shi se lu ior mba injaav sha ajiir a ase, shi nga a taver icombor yase ishima u lun ken mzough shi lun a inja i dedoo. Er se fe wang ser “Aôndo ka u sangen a sange ior ga” yô, se mba nengen ayol a ase ser se mba tsombor môm, u ior mba civir Aôndo sha tar cii. Akaa a se ne jighjigh a mi la nga wasen se u eren kwagh ken mzough; kwagh u mbavia a mbavia ngu ken a vese ga shin mpav u pati u eren a van a mi la kpaa ga. Er se lu er ior mbagenev nahan kpa, uma wase gema ngu kposo.—Aerenakaa 4:13; 10:34, 35.

• Mbashiada mba Yehova mba er ior mbagenev nahan sha nyi gbenda?

• Ka akaa a doon Aôndo ishima a nyi Mbashiada ve hen ken Bibiloo?