Иегованың Херечилериниң кайы-бирээзин билир силер бе? Олар силерниң кожаларыңар, кады ажылдап турар улузуңар, чаңгысклассчыларыңар азы силерниң-биле Библияны өөренип турар улус болур чадавас. Чогум Иегованың Херечилери дээрге кымнарыл ол база олар чүге өске улуска бүзүрелиниң дугайында чугаалап турарыл?

Бис анаа кижилер бис. Иегованың Херечилери дээрге янзы-бүрү язы-сөөк, культура болгаш ниитилелдиң аңгы-аңгы кезектеринден тургустунган улус-тур. Бистиң чамдыывыс ооң мурнунда өске шажын-чүдүлгелерге хамааржыр турган, а өскелеривис Бурганга шуут бүзүревес чораан. Ынчалзажок Иегованың Херечилери апаарының мурнунда Библияның өөредиглерин кичээнгейлиг шинчилеп өөренген бис (Ажыл-чорудулга 17:11). Билип алган билиглеривис бисти бүзүреткен, ынчангаш Иегова Бурганга чуртталгавысты бараалгадыр деп, шиитпирлээн бис.

Библиядан билиглерни үнелеп турар бис. Шупту улустуң ышкаш, бистиң база бергелеривис-даа, кошкак талаларывыс-даа бар. Ынчалза-даа библейжи дүрүмнерге дүүштүр чурттаарын кызып турарывыстың ачызында бистиң чуртталгавыс аажок экижээн, ынчангаш оон-даа аас-кежиктиг апарган бис (Ырлар 127:1, 2). Ол дээрге Библиядан билип алган билиглеривисти өскелерге чүү дээш чугаалап турарывыстың чылдагааннарының бирээзи-дир.

Бурганның хоойлу-дүрүмнери-биле чурттап турар бис. Олар Библияда бижиттинген. Бурганның хоойлу-дүрүмнери биске чедимчелиг болурувуска дузалап, өскелерге хүндүлээчел болурун, шынчы алдынарын, буян кылырын өөредип турар. Олар кижилерге ниитилелдиң төлептиг кежигүннери болурунга дузалап, өг-бүлелерни быжыктырып, мөзү-шынарны бедидип турар. «Бурган улусту ылгай көрбес», ынчангаш бис кижилерни язы-сөөгү болгаш политиктиг көрүштери дээш ылгай көрбейн турар бис. Иегованың Херечилери дээрге чөптүг-шынныг чорукту үнелеп турар, ёзулуг делегей чергелиг ха-дуңма-дыр. Бис анаа кижилер-даа болзувусса, чон кылдыр онзагай бис (Ажыл-чорудулга 4:13; 10:34, 35).

• Иегованың Херечилери дээрге анаа кижилер деп чүге чугаалап болурул?

• Библиядан билиглерниң ачызында Иегованың Херечилериниң чуртталгазы канчаар өскерли бергенил?