¿Jayeb ta jtul testigoetik yuʼun Jehová ya anaʼbey sba te jaʼate? Ayniwan jaʼ jpat jxujk jbatik, o joʼtak jbatik ta aʼtel o ta nop jun sok ayniwan kʼopojemotik sok jaʼat ta swenta te bin ya yal te Bibliae. ¿Machʼaonkotiknix ta smelelil-a, sok bin yuʼun te ya jcholbeykotik yaʼiy te ants winiketik te bintik jchʼuunejkotike?

Jpat jxujkme jbatik. Ta jpisilkotik yanyantik jtsʼumbalkotik soknix ay te machʼatik ay skʼulejalik sok ay yantik te maʼyuk bin ay lek yuʼunike. Ay chaʼoxtul te ay jreligionkotik-ae sok ay maba jchʼuunejkotik Dios-a. Jaʼukmeto te kʼalal mato ochemonkotik ta testigo yuʼun Jehovae, jpisilkotik la jlokʼeskotik tiempo ta snopel ta lek te bintik ya yalbey skʼoplal te Bibliae (Hechos 17:11). La jchʼuunkotik te bin la jnopkotik ta Bibliae, ta patil joʼonkotiknix la jtakotik ta nopel ta swenta yichʼel ta mukʼ te Jehovae.

Jaʼ ya skoltayonkotik te snopel te Bibliae. Jichonkotiknix euk te bitʼil yantik ants winiketik te ya jtakotik kʼopetik soknix ay ya xchʼayonkotik euk, jaʼukmeto jaʼ wokolyal te bitʼil ya jpaskotik tulan ta spasel ta jkuxlejalkotik te mantaliletik yuʼun Dios ta jujun kʼajkʼale, ta swenta-abi kʼax lekuben te jkuxlejalkotike (Salmo 128:1, 2). Jaʼ ta swenta-abi te ya jcholbeykotik yaʼiy te ants winiketik te bintik tʼujbil jnopojkotik ta Bibliae.

Jaʼ ya jpas ta jkuxlejalkotik te mantaliletik yuʼun te Diose. Te mantaliletik ini, te ay ta nopel ta Bibliae, ya yakʼ te lek ya kaʼiy jbakotik yuʼune. Soknix ya stij koʼtankotik ta yichʼel ta mukʼ te jpat jxujkotike, te manchuk ya x-elkʼajonkotik sok te ayuk yutsil koʼtankotike. Jaʼnix jich ya skoltayonkotik te lekuk ya x-aʼtejonkotik ta bayuke, te junuknax ayonkotik sok te jayeb machʼatik ay kuʼunkotike soknix te lekuk te jtalelkotike. Kʼoem ta koʼtankotik «te mayuc machʼa nax tsahbil yuʼun te Diose». Jaʼ yuʼun ay kermanotaktik ta swolol Balumilal, melel maba jaʼ ya xatotik te bitʼil yanyantik te jtsʼumbalkotike soknix te bitʼil yanyantik te jnacionkotike. Manchukme pajalonkotik sok te yantik ants winiketike, jaʼukmeto maba ya spajonkotik te bitʼil junax ayonkotike (Hechos 4:13; 10:34, 35).

• ¿Bin-a te pajalonkotik yuʼun sok te yantik ants winiketike?

• ¿Bintik mantalil yakʼoj jnopkotik te Bibliae?