Zimbangi zi Yehova zikua zebi e? Bankaka mu beto badi banfinangani ziaku, bakundi baku ba kisalu voti ba nzo-nkanda. Voti tumesolula yaku masolo ma Bibila. Tuidi banani, ayi bila mbi tueta tubila kudi batu boso mambu momo tueta wilukila?

Tuidi kuandi dede batu boso. Tuidi batu ba zitsi ziphila mu phila, bankaka biphumbulu ayi bankaka bamvuama. Bankaka mu beto baba mu mabundu ma phila mu phila, ayi bankaka babe wilukilanga Nzambi ko. Vayi, wumosimosi mu beto wutadila thete niandi veka malongi ma Bibila mbotembote tekila ka ba Mbangi yi Yehova. (Mavanga 17:11) Tukikinina mambu momo tulonguka, ayi ku manima, wumosimosi mu beto wusobula sambila Yehova Nzambi.

Longuka Bibila kueta kutunatina mambote. Dede kuandi bato boso, beto phe tueta dengana mambu ma phasi, tuidi ayi mambu momo meta kutuyamisa. Vayi bo tueta tula ngolo mu sadila malongi ma Bibila mu luzingu lueto lu lumbu ka lumbu, yawu yimebongisa buwombo luzingu lueto. (Nkunga 128:1, 2) Didi diambu dimosi mu mambu momo meta kututinda tutubila mambu ma mbote momo tumelonguka mu Bibila.

Tuetalandakana zitsikudukusu zi Nzambi mu luzingu lueto. Zitsikudukusu zio Bibila kieta longa zieta kutusadisa tukimona mbote, tuzitisa bankaka, ayi tumonisa bikadulu dede kuikama ayi buphombo. Zitsikudukusu beni zieta kutusadisa tuba buvini, batu bobo bazebi sala kisalu, tuba lubundanu mu dikanda, ayi mavanga mambote. Bo tuzebi ti “Nzambi katalanga bizizi bibatu ko,” diawu tuididi dikanda di baphangi bobo babedi mu nza yimvimba. Tuisi ko bavambana mu diambu di nkanda voti politiki. Kadiambu ko tuidi dede batu boso, tuidi dikanda dimosi diodi difuanini kudi dikanda kinkaka ko mu nza yimvimba.—Mavanga 4:13; 10:34, 35.

• Mu mambu mbi Zimbangi zi Yehova badidi dede batu boso?

• Bikadulu mbi bio Zimbangi zi Yehova badi, bio bamelonguka mu Bibila?