¿Jaytúul u j-jaajkunajoʼob Jéeoba a kʼaj óol? Maʼ xaaneʼ jujuntúul tiʼ letiʼobeʼ a vecinoʼob, a wéet meyajoʼob wa a wéet xookoʼob. Wa maʼ xaan xaneʼ tsʼoʼok u tsikbaloʼob ta wéetel yoʼolal le Bibliaoʼ. Baʼaleʼ ¿máaxoʼob jach tu jaajil yéetel baʼaxten ku tsikbaltikoʼob tiʼ tuláakal máak le baʼaxoʼob ku creertikoʼoboʼ?

Beyoʼon jeʼex u maasileʼ. Toʼoneʼ tiʼ jejeláas tuʼuxoʼob yanoʼon, yaan tiʼ toʼoneʼ óotsiloʼon yéetel yaneʼ maas chan yaan modo tiʼob. Jujuntúul tiʼ toʼoneʼ yaanal religión yaantoʼon kaʼach yéetel yaneʼ maʼatech u creertik wa yaan Dios kaʼachi. Baʼaleʼ táanil tiʼ k-kʼuchul k-beetba u j-jaajkunaj Jéeobaeʼ, tuláakloʼon t-jóoʼsaj u súutukil utiaʼal k-xakʼaltik yéetel k-naʼatik le baʼax ku kaʼansik le Bibliaoʼ (Baʼaxoʼob 17:11). Ka tsʼoʼok k-kaanbaleʼ, chéen t-juunal t-chʼaʼtuklaj k-adorartik Jéeoba Dios.

Yaʼab utsiloʼob ku taasiktoʼon k-xokik le Bibliaoʼ. Jeʼex tuláakal máakeʼ, toʼon xaneʼ yaantoʼon talamiloʼob yéetel tumen kʼeban wíinikoʼoneʼ yaan xan baʼaxoʼob maʼ maʼalobtak k-beetkiʼ. Baʼaleʼ k-ilik k-tsʼáaik sáamsamal ichil k-kuxtal le baʼax ku yaʼalik le Bibliaoʼ, le oʼolal maas yaantoʼon kiʼimak óolal (Salmo 128:1, 2). Lelaʼ le péeksikoʼon k-tsʼáa u yojéelt le máakoʼob baʼax ku kaʼansik le Bibliaoʼ.

Letiʼe Biblia nuʼuktik k-kuxtaloʼ. Le nuʼuktaj ku tsʼáaik le Bibliaoʼ ku yáantkoʼon utiaʼal u bintoʼon maʼalobil yéetel ku péeksikoʼon k-eʼes tsiikil tiʼ u maasil, k-eʼes k-utsil yéetel maʼ k-beetik kʼaas tiʼ mix máak. Tsʼoʼoleʼ ku yáantkoʼon xan utiaʼal k-bis junpʼéel maʼalob kuxtal, ka yanaktoʼon kiʼimak óolal ichil k-familia yéetel ka kuxlakoʼon jeʼex uts tu tʼaan Dioseʼ bey xan ka k-áant u maasil. Toʼoneʼ jach k-ojel «Dioseʼ mix máak jelaʼan u paktik», le oʼolal ichil u j-jaajkunajoʼob Jéeobaeʼ jejeláas máakoʼob tiʼ jejeláas luʼumiloʼob yaniʼ, yéetel mix máak u pʼekmuba yoʼolal u raza wa tumen táanxel luʼumil u taal. Kex tumen kʼeban wíinikoʼon xaneʼ, minaʼan uláakʼ máakoʼob jeʼex u j-jaajkunajoʼob Jéeobaeʼ (Baʼaxoʼob 4:13; 10:34, 35).

• Toʼon u j-jaajkunajoʼon Jéeobaeʼ, ¿tiʼ baʼax chíikaʼanoʼon tiʼ u maasil máakoʼoboʼ?

• ¿Bix u yáantkoʼon le baʼaxoʼob tsʼoʼok u kaʼansiktoʼon le Bibliaoʼ?