¿Balac testigos xtuny Jehová rimbulo? Pentzi toibticado nacdo ni rabés gahxca ro rabéslo, o buñ ni ronynélo dxiin, o ni riélo scuel toibsiné, sigory láaca ma gonido de la Biblia né looy toibtica buelt. ¿Xí claspa buñ nacdo, né xigony raibydo buñ ni ronydo crer ni sieed ló la Biblia?

Nacdo buñ ni rabés gahx ro rabéslo. Laddo noʼ buñ de guirá clas gudx. Tipnésdo gopdo toib religión, tipnésdo diti bunydo crer que noʼ Dios, ná scú gocni dzú diti ma gócdo testigos xtuny Jehová guirádo goleʼdo tiemp par bisuidytzaydo la Biblia (Hechos 17:11). Biluladxdo ni biendo né ni maca stip lóodo biduidydo xtiitzdo, gony adorardo Jehová Dios.

Rasuidydo la Biblia né láani racnéni lóodo. Xomod guirá buñgudxlio, radudydo ló galnagan né láaca rioʼ ór noʼ ni rachiin lóodo gonydo cós mal. Rabésdo más galándiguieʼ portín ronydo por guisobdo litz ni sieed ló la Biblia (Salmo 128:1, 2). Ndeʼ nac toibtica razón por ni lóodo raninédo stipnés buñ de cós tzaay ni ma bisuidydo ló la Biblia.

Rasobdo ni Dios raiby lóodo. Litz ni la Biblia rasuidy, ronyni que guiguaʼdo sacroyen. Láaca rachiinni lóodo gapdo respet guirá buñ né gacdo buñ ni natzaay xcalrrien né ronladxdo saʼdo. Litz ni rasuidy la Biblia lóodo, racnéni guisacdo sacroyen par gacnédo né gacdo buñtzay né stipnés buñ, láaca ronyni que family guiguaʼ toibsi, né racnéni lóodo par diti gonydo cós yox. Nagudx rac xtiitzdo que «Dios diti rabú», por ngú xhermando noyibu ló guidopynac Gudxlio, ragobiodo layibu ná nacyibu gadzé color o de stoib gudx, né diti rioʼdo lad partid. Ná radudydo ló galnagan xomod nitisi buñ, nacdo toib gudx ni diti noʼ stoib xomod láani (Hechos 4:13; 10:34, 35).

• ¿Xí cós rasaclóo testigos xtuny Jehová ni láaca rasaclóo guirá buñ?

• ¿Xí litz ma bisuidy la Biblia lóodo?