Mucho maga gente ta pensa que el Maga Testigo de Jehova amo un nombre del un nuevo religión. Pero, mas de 2,700 año ya pasa ta llama ya con el maga siervo del unico verdadero Dios como el su “maga testigo.” (Isaias 43:10-12) Antes el año 1931, conocido kanamon como maga Estudiante del Biblia. Porque ya iscuji kame con el nombre Maga Testigo de Jehova?

Ta manda este conocé con el diamon Dios. Asegun na maga manuscrito de antes, el nombre del Dios, Jehova, puede incuntra cerca siete mil beses na Biblia. Na manada Biblia ya quita sila con ese nombre y ya cambia titulo igual Señor o Dios. Pero, el verdadero Dios ya revela con Moises el su mismo nombre Jehova, hablando: “Este el de mio nombre hasta para cuando.” (Exodo 3:15) Na ese manera, ya dale le mira que diferente le na maga falso dios. Con grande alegria kame ta lleva con el sagrao nombre del Dios.

Ta dale este mira si cosa el diamon trabajo. Principiando na un buen gente, si Abel, manada gente de antes ya demonstra el diila fe con Jehova. Adentro de mucho siglo, si Noe, Abraham, Sara, Moises, David y mucho pa otro el ya queda parte del “bien manada . . . maga testigo.” (Maga Hebreo 11:4–12:1) Igual como un testigo na corte que afavor na un inocente persona, determinao kame manda sabé el verdad acerca con el diamon Dios.

Ta imita kame con Jesus. Ta llama con ele na Biblia “el Testigo fiel y deverasan.” (Revelacion 3:14) Si Jesus mismo el ya habla que ‘ya manda le conocé el nombre del Dios’ y ‘ya man testigo le por causa del verdad’ acerca con Dios. (Juan 17:26; 18:37) Entonces, el maga verdadero siguidores de Jesus debe lleva y manda conocé el nombre de Jehova. Ese el cosa ta pricura hace el maga Testigo de Jehova.

• Porque ya iscuji el maga Estudiante del Biblia con el nombre Maga Testigo de Jehova?

• Del cuando pa ya tiene maga testigo si Jehova aqui na tierra?

• Quien el de con todo fiel Testigo de Jehova?