Chómmóng aramas ra ekieki pwe Chón Pwáraatá Jiowa ina iten eú mineféén lamalam. Iwe nge, lap seni 2,700 ier lóóm, ewe Paipel a erá pwe ekkewe chón angang ngeni ewe emén Kot mi enlet, iir néún “chon pwärätä.” (Aisea 43:10-12) Tori lón ewe ier 1931, aramas ra silekem ren ewe it Chón Káé Paipel. Nge pwata ám aua iteni ena it Chón Pwáraatá Jiowa?

Ena it a esissillatá ám we Kot. Me ren ekkewe kapiin Paipel me lóóm, iten Kot we Jiowa, a pwá fán fitu ngeréú lón ewe Paipel. Lón chómmóng afféwún Paipel, ena it a siwil ngeni ekkeei itelap, usun Samol are Kot. Nge, ewe Kot mi enlet a pwisin pwári itan we Jiowa, a erá: “Iei itei tori feilfeilachök.” (Ekistos 3:15 *) Ena it a asókkalóói pwisin i seni meinisin ekkewe kot chofona. Ám aua pwapwa le iteit seni iten Kot we mi pin.

Ena it a áweweei ám angang. A wor tettelin ekkewe aramasen lóóm, poputá seni ewe mwán mi pwúng Epel, ra pwáraatá ar lúkú Jiowa. Lón ekkewe fite púkú ier, Noa, Apraham, Sara, Moses, Tafit, me ekkewe ekkóch ra fit lein ei “watten mwichen chon pwärätä.” (Ipru 11:4–12:1) Ám Chón Pwáraatá Jiowa aua tipeppos le pwáraatá ewe enlet usun ám we Kot. Usun án emén epwe pwáraatá lón imwen kapwúng fán iten emén ese wor tipisin.

Aua ákkáppirú Jesus. Ewe Paipel a eita ngeni Jesus “ewe Chon Pwärätä mi allükülük o let.” (Pwärätä 3:14) Jesus a pwisin erá pwe a ‘esile ngeniir iten Kot’ me “pwärätä mine a let” usun Kot. (Johannes 17:26; 18:37) Ina minne ekkewe wesewesen chón tapweló mwirin Kraist ra pwári me esilei iten Jiowa. Ina met ekkewe Chón Pwáraatá Jiowa ra achocho le féri.

• Pwata ekkewe Chón Káé Paipel ra filatá ewe it Chón Pwáraatá Jiowa?

• Seni ineet a wor néún Jiowa chón pwáraatá wóón fénúfan?

• Ié ewe Chón Pwáraatá mi lapalap usun Jiowa?