Ebas’a Mboṅ a Yehova e titi ya peńa kana jita ba mo̱nge̱le̱no̱. Etum a ponda, o mińa ma muto̱ped’a mudī Yesaya, Loba mo̱me̱ne̱ a bele̱ baboledi bao ba mbale̱ ná “mboṅ.” (Yesaya 43:10-12) Di belabe̱ ná Bokwe̱ Bibe̱l nate̱na o mbu ma 1931. Nde ońola nje di wengisane̱no̱ dina lasu, o no̱ngo̱ la Mboṅ a Yehova e?

Di malee̱le̱ nja ńe Loba lasu. O Bibe̱l ya boso, Yehova, dina la Loba di maso̱be̱ oten lokoli la ngedi. O betukwedi ba Bibe̱l, jita ba wengisane̱ di dina na we̱le̱ o epol’ao beto̱ti ka Sango to̱so̱ Loba. Nde, Loba mo̱me̱ne̱ okwe̱le̱ Mose dina lao, Yehova, a yikiye̱ mo̱ ná: “dina lam din ońola bebe be̱se̱.” (Bebusedi 3:15) Nika e we̱le̱ diwengisan jombwea mo̱ na maloba ma mpoṅ. Je muńe̱nge̱ o bambe̱ dina la bosangi la Loba.

Di mabīse̱ ebol’asu. Botea ponda nute̱m ná sim Abel, bato jita bate̱m ná sim ba bambe̱ dina la Yehova. Noa, Abraham, Sara, Mose, na David be o mu mulo̱ṅ ma di “diwindiwindi la mboṅ.” (Bonahebe̱r 11:4–12:1) Kana moto eno̱ ná a be̱ mboṅ o ndabo a bekaisedi, o bwam ná njo̱m e si numabe̱ nupe̱pe̱, di mabola me̱se̱ ná mbale̱ e biane̱ jombwea Loba lasu.

Di mabupe̱ eyembilan a Yesu. Bibe̱l e mabele̱ Yesu ná “mboṅ a jemea na ńa mbale̱.” (Bebīsedi 3:14) Mo̱me̱ne̱ a kwali ná a ‘bīse̱ bato dina la Loba’, a ‘boli pe̱ mboṅ ońola mbale̱’ jombwea Loba. (Yohane 17:26; 18:37) Ońola nika nde Kriste̱n ya mbale̱ yangame̱ne̱no̱ bambe̱ na bīse̱ dina la Yehova. Miwe̱n masu me̱se̱ me nde ońola nika.

• Ońola nje Bokwe̱ Bibe̱l ba no̱ngino̱ dina la Mboṅ a Yehova e?

• Botea njika ponda Yehova a be̱nno̱ mboṅ o wase e?

• Nja ńe Mboṅ a Yehova ninde̱ne̱ e?