Nyimpa pii susũ dɛ Jehovah Adasefo yɛ ɔsom fofor bi a ɔaba ne dzin. Naaso, bɔbor mfe 2,700 a abɛsen kɔ no, wɔkãa nokwar Nyankopɔn kor pɛr no asomfo ho asɛm dɛ wɔyɛ ‘n’adasefo.’ (Isaiah 43:10-12) Ansaana afe 1931 reba no, nna wɔfrɛ hɛn Bible Esuafo. Ebɛnadze ntsi na yɛfaa dzin Jehovah Adasefo too hɛnho do?

Ɔkyerɛ Nyankopɔn kor a yɛsom no. Dɛ mbrɛ tsetse nsaano nkyerɛwee kyerɛ no, Nyankopɔn dzin Jehovah no pue wɔ Bible no mu bɛyɛ mpɛn 7,000. Wɔ Bible nkyerɛase ahorow pii mu no, wɔdze abɔdzin ahorow bi tse dɛ Ewuradze, Nyankopɔn anaa Nyame esi dɛm dzin yi ananmu. Naaso nna nokwar Nyankopɔn no ada noho edzi akyerɛ Moses dɛ ne dzin dze Jehovah, na ɔkãa dɛ; “Emi nye JEHOVAH.” (Exodus 6:2) Wɔ dɛm kwan yi do no, Nyankopɔn daa noho edzi dɛ ɔyɛ soronko fi ator enyame nyinara ho. Yebu no dɛ ɔyɛ hokwan kɛse dɛ Onyankopɔn dzin krɔnkrɔn no da hɛn do.

Ɔkyerɛ botae a osi hɛn enyiwa do. Ofitsi ɔtseneneenyi Abel do no, nyimpa pii edzidzi do atsena ase wɔ tsetseberdo a wodzii hɔn gyedzi wɔ Nyankopɔn mu no ho dase. Mfe ɔhaha pii a abɛsen kɔ no, Noah, Abraham, Sarah, Moses, David nye afofor pii bɛkãa dɛm “adasefo mununkum kɛse” yi ho. (Hebrewfo 11:4–12:1) Dɛ mbrɛ obi botum edzi dase ama obi a noho nnyi asɛm wɔ asɛndzibea no, hɛn so yeesi hɛn bo dɛ yɛbɛma afofor eehu nokwar a ɔfa hɛn Nyankopɔn no ho.

Yerusũasũa Jesus. Bible no frɛ Jesus dɛ “ɔdasefo sɛnkordzifo nye nokwafo.” (Nyikyerɛ 3:14) Jesus nankasa kãa dɛ ‘oyii Nyankopɔn dzin kyerɛe’ na ɔkɔr do ‘gyee nokwar’ a ɔfa Nyankopɔn “no ho dase.” (John 17:26; 18:37) Ntsi hɔn a wɔyɛ Christ nokwar ekyirdzifo ankasa no dzi Jehovah dzin ho dase, na wɔma nkorɔfo hu dzin no. Iyi na Jehovah Adasefo bɔ mbɔdzen dɛ wɔbɛyɛ.

• Ebɛnadze ntsi na Bible Esuafo no faa dzin Jehovah Adasefo too hɔnho do?

• Ofitsi ber bɛn na Jehovah enya adasefo wɔ asaase do?

• Woana nye Jehovah ne Dasefo a ɔsen obiara?