Ni onlo moun ki ka kwè kè Témwen a Jéova sé non a on nouvo rèlijyon. É poutan, ni pliski 2700 zan dè sa, lè Bondyé té ka palé dè sèwvitè a-y, i té ja ka di yo sé « témwen » a-y (Izayi 43:10-12). Avan 1931, non an nou sé té Étidyan a Labib. Men konnyéla, non an nou sé Témwen a Jéova. Poukwa nou chwazi pòté non-lasa ?

Non-lasa ka montré ki Dyé nou ka sèvi. Adan ansyen maniskri a Labib, nou ka konstaté kè non a Bondyé ka parèt près 7000 fwa. Men adan onlo vèrsyon a Labib, yo mété dé tit kon Sényè oben Létèwnèl an plas a non a Bondyé. É poutan, vré Dyé-la limenm dévwalé Moyiz kimoun i yé lè i di-y non a-y sé Jéova. É i ajouté : « Sa sé non an mwen pou touttan » (Ègzòd 3:15). Konsa, ou pé pa konfonn-li èvè sé fo-dyé-la. Nou ka pòté non a Bondyé, on non ki sen, é nou fyèw dè sa.

Non-lasa ka montré ki misyon nou ka akonpli. On séri moun fidèl, a koumansé pa Abèl, té ni fwa an Jéova é yo té ka sèvi-y témwen. Aprésa, Noé, Abraam, Sara, Moyiz, David é dòt ankò vin gonflé « gwo niyaj témwen » lasa (Ébré 11:4–12:1). Menmjan on moun pé sèvi témwen adan on tribinal pou défann on inosan, sé menmjan-la nou paré pou fè moun konnèt lavérité si Bondyé.

Nou ka imité Jézi. Labib ka kriyé Jézi « témwen fidèl é véridik » la (Révélasyon 3:14). Jézi limenm ni lokazyon di kè i fè moun konnèt non a Bondyé é kè i « témwanyé » an favè a lavérité (Jan 17:26 ; 18:37). Donk disip a Jézi dwètèt pòté non a Bondyé é fè moun konnèt non-lasa. Sé sa Témwen a Jéova ka chèché a fè.

• Poukwa sé Témwen a Jéova Étidyan a Labib pran konm non ?

• Dépi konmen tan Jéova tin témwen asi latè ?

• Kimoun ki pli gran Témwen a Jéova ?