Ke li binli 1931 daa pundi bi den yii-​ti ke “yaaba n bangi biibili yeni”. Laa binli n pendi ti yeli lebidi tua Jeova Siedinba. Bi niba boncianla tua ke ti tie jaanbuolipaano. Ama yaala n cie bina 2 700 leni moala, i moamoani Tienu den yii o ŋoadikaaba ke o “siedinba”.—Esayi 43:⁠10-​12.

Laa yeli wangi tin daani yaa Tienu. U tienu yeli Jeova den ye i kaani boncianla biibili tikpela nni, yaala ke bi diani leni u nu. Ama biibili boncianla lebidi laa yeli leni a kpiagidi yela nani U Tienu bi O Diedo. Ki nan sua ke i moamoani Tienu mo den waani Musa o yelicele Jeova yeni. O den yedi-​o: “n yeli n yeni yaa yogu n tuu yaa yogu”. (Mi Ñama 3:⁠15) Leni laa yeli U Tienu gagidi O yuli leni i faatieni yeni. Tin yii Jeova Siedinba tie tipo ti jigidi.

Laa yeli wangi ti tuonli n tie yaala. Ŋali o niteginka Abela yogunu, U Tienu ŋoadikaaba boncianla den tiendi siedo O yeli po, ki go den daani-O. A bina n pendi Nowe, Abalama, Sala, Musa, Dafidi leni nitoaba den ye “yaa siedinba n yaba boncianla” yeni siiga. (Hebilunba 11:​4-​12:⁠1) Nani li bujiali daali, o Siedo n wangi yua n pia i moamoani yeni, ti moko bua leni ti pala kuli ki tieni Siedi U Tienu po, bi niba n bandi i moamoani po wan tie yua.

Jesu wani oba tie siedo. Biibili nni bi yii Jesu “o siedidugika leni o moamoandaano”. (Mi Doagidima 3:⁠14) Jesu wani oba yedi ke o cedi ke bi bandi U Tienu yeli ki go “tiendi siedi i moamoani po”. (Jan 17:⁠26; 18:⁠37) Lani n cedi ke Jesu ŋoadikaaba yeli tua Jeova Siedinba. Nani Jesu, bi wangi bi niba U Tienu yeli. Li tie laa tuonli ke Jeova Siedinba tiendi.

• Beepo ke “yaaba n bangi biibili yeni” lebidi bi yeli ke li tua Jeova Siedinba?

• Ŋali ole yogunu ke Jeova pia Siedinba ki tinga nni?

• Ŋme n tie Jeova Siedo yua n ki pia lie?