Ovandu ovengi ve muna kutja ena ndi Ovahongonone vaJehova, ena rokereka ombe. Posi yokutja, ozombura zokombanda 2 700 nḓa kapita, ovakarere vaMukuru watjiri aave tjiukwa ‘otjovahongonone’ ve. (Jesaja 43:10-12) Nga kombura ndji 1931, eṱe aatu tjiukwa otjOvakonḓonone vOmbeibela. Ongwaye tji twa yakura ena ndi Ovahongonone vaJehova?

Oro ri tjiukisa Mukuru wetu. Otja komatjangwa omakuru, ena raMukuru, Jehova, ri munika ovikando omayovi omengi mOmbeibela. MozOmbeibela ozengi ena ndi ra pingenisiwa nomaisaneno wondjozikiro tjimuna Muhona, Ndjambi poo Mukuru. Posi yokutja, Mukuru watjiri we ritjiukisa kena re omuini, Jehova, indu tja tja: “Kutja imb’ ovihupe viovandu ve pahe Jehova, novahaiden avehe, mba isanenua ena randje kombanda jauo, Muhona ma tja nai, ngu ma tjiti imbi avihe.” (Oviungura 15:17, EEP) Momuano mbwi, ena re eyapuke ri mu haṋa koomukuru vovisenginina, nu eṱe tjiri tu tjaterwa okutjiukirwa kena ndo.

Ena ndo ri tjiukisa oviungura vyetu. Moruveze orukuru ovandu ovengi, okuutira komurumendu omusemba Abel, va hongonona ohunga nongamburiro yawo mu Jehova. Momakayendero woruveze, Noa, na Abraham, na Sara, na Moses, na David, na varwe ve rikuta ‘kotjimbumba tjovahongonone’ hi. (Ovaheberi 11:4–12:1) Tjimuna omundu tje hongononena omundu warwe omuhinandjo motjombanguriro, eṱe wina tu nonḓero yokuhongonona ouatjiri ohunga na Mukuru wetu.

Mokuungurisa ena ndi eṱe tu horera ku Jesus. Ombeibela i mu isana kutja “omuṱakame nomuhongonone watjiri.” (Omavandururiro 3:14) Jesus omuini wa tja, eye wa ‘tjiukisa ena raMukuru kovandu’ nu wa ‘hongonona ouatjiri’ ohunga na Mukuru. (Johanes 17:26; 18:37) Okutja ovakongorere vaKristus vatjiri mave sokuhongonona ouatjiri ohunga nena raJehova nave ri tjiukisa. Ihi Ovahongonone vaJehova otji ve kondjisa okutjita.

• Omena ratjike Ovakonḓonone vOmbeibela tji va yakura ena ndi Ovahongonone vaJehova?

• Jehova wa uta ruṋe okukara novahongonone kombanda yehi?

• Owaṋi ngu ri Omuhongonone waJehova omunenenene?