Nukap aentska Testigos de Jehovaka yamaipiat jiínkiaruiti tu wéarmayi. 1931 uwí jéatsaink, Estudiantes de la Biblia tu naartiniúyaji. Túmaitkiuisha, Yuús ti yaúnchuksha niin umirín ármiania nuna “winia takártiniaitrume” tusa “testigos” tu anáikiamiayi (Isaías 43:10-12). Ainis asamtai yamaisha tuke Testigos de Jehová naártiniaitji. Warí najánatin asákrinia Yuús tu anáitiamkaitiaj?

Yuuska naarun nekaáwarat tusa wakérawai. Yama nankamtaik Yuusa chichamen papiinium aainiak Jehová naarin ti nukap aárarmiayi. Túmaitkiuisha Yuús Papií yamaipiat najánawarua nuinkia, Jehová naárinkia aárcharuiti. Ántsuka áyataik “Uunt Yus” túrutskesh “SEÑOR” tu aáraruiti. Túmaitkiuisha, Yuús ti yaúnchuksha niin umirín ármiania nuna chicharainiak: “Wikia Jehová naártiniaitjiai” tímiayi (Isaías 42:8). Nuna tákunka, antar yuús írunna nújainkia métekchaitjiai tusa Yuuska Jehová tu anáimiakmiayi. Tuma asamtai Testigos de Jehovátikia Yuusa naari étserkur shiir enentaimji.

Yuusa naari nekámtikniuitji. Yaúnchuksha Abel, Noé, Abrahán, Sara, Moisés, David, Jehová naárinkia etserin ármiayi. Nuyá chikichcha nukap irúnmiayi. Tura niisha “testigos” ármiayi tawai Yuús Papií (Hebreos 11:4–12:1, Traducción del Nuevo Mundo [NM]). Jui enentáimsakia: yaksha antar makurmárakrin chichamprutkat tusar testigo achíaji. Áintsankete, Yuús ni chichamen nekasa nuna ayamprútkarat tusa Testigos anáitiamkaitji.

Jesús najánamia núnisrik iisha túriniaitji. Jesúsnaka Yuús Papiíniumka “testígoiti” tawai, ‘wáitrutsuk nekasa nunák tiniu’ asamtai (Revelación 3:14, NM; Yuús Papiinium shuar chichamjai Apukarípsis 3:14 apatkam áujsata). Jesús juú nunkanam pujumia nui tímiayi: “Ashí shuaran nekas ana nuna ujaktinian táwitjai” (Juaṉ 18:37). Tura Jesús ni aparín seak tímiayi: “Aparu, [...] ashí aénts ame náarmin shiir enentáimtusarti” (Juaṉ 12:28). Tuma asamtai nekás Kristu aéntstikia Jehová naari tákaku asár ni naari etsérniuitji.

• Urúkamtai Testigos de Jehová naártiniaitiaj?

• Yaúnchuksha ya Testigos de Jehová armia?

• Ya nekassha Jehová naarin imiá etserkait?