Kuaʼa̱ na̱yivi káʼán ná ña̱ viti cháá vá ni̱ kana religión na̱ testigo Jeová. Jo, si̱ yáʼa ka̱ 2.700 kuia̱ ña̱ ni̱ kachi Tu̱ʼun Ndio̱s ña̱ na̱ sínukuáchí nuu̱ iin túʼún láá Ndio̱s ndaa̱ ndisa, na̱yóʼo kúú ná na̱ “testigo” si (Isaías 43:10-12). Tá yachi̱ Na̱ jákuáʼa Tu̱ʼun Ndio̱s va ni̱ si̱ káʼa̱n na̱ xíʼín nduʼu̱, jo tá kuia̱ 1931 já ni̱ ka̱sáʼá nduʼu̱ naní ndú na̱ testigo Jeová. Jo, ¿ndiva̱ʼa ni̱ sinu̱ ini nduʼu̱ kananí ndú jaá?

Jáchi̱ ña̱yóʼo náʼa̱ ndá yoo kúú Ndio̱s nduʼu̱. Tátu̱ʼun usa̱ mil ká taʼndá va̱si kivi̱ míí Ndio̱s, Jeová, nuu̱ Tutu ii̱, ki̱ʼa jaá va̱sian nuu̱ kuaʼa̱ tutu ña̱ ni̱ taa na tá si̱naʼá. Nuu̱ kuaʼa̱ tutu ii̱ ni̱ ja̱kúsio na kivi̱ Ndio̱s ta ni̱ chikaa̱ na̱ Sa̱toʼo á Ndio̱s va. Jo míí vá Ndio̱s ni̱ kaʼa̱n xíʼín Moisés ña̱ Jeová va naní sí, ta ni̱ kachi si: “Ña̱yóʼo kúú ki̱ví yuʼu̱ ndijaá táʼa̱n kivi̱” (Éxodo 3:15). Jaá ni̱ naʼa̱ si ña̱ ko̱ kúú sí tátu̱ʼun ndijaá táʼa̱n ndio̱s ña̱ ko̱ ndáa̱. Ta kújii̱ ndiva̱ʼo ini nduʼu̱ ña̱ naní ndú na̱ testigo Jeová.

Jáchi̱ ña̱yóʼo náʼa̱ ndá chúun ni̱ si̱ʼa Ndio̱s nu̱ú nduʼu̱. Kuaʼa̱ na̱yivi na̱ ni̱ si̱ndoyi tá si̱naʼá tátu̱ʼun iin ta̱a va̱ʼa ini ni̱ si̱naní Abel, ni̱ kaʼa̱n na̱ ña̱ ni̱ ka̱ndeé ini na Jeová Ndio̱s. Tá ni̱ yaʼa kuaʼa̱ kuia̱ já ni̱ si̱ndoyi java ka̱ na̱yivi tátu̱ʼun Noé, Abrahán, Sara, Moisés xíʼín David, ta ni̱ nduu na̱yóʼo kuendá ‘kuaʼa̱ na̱yivi na̱ kúú testigoʼ (Hebreos 11:4–12:1). Jáchi̱ tátu̱ʼun ki̱ʼa kée iin na̱yivi tá kuaʼa̱n na̱ kaʼa̱n na̱ ña̱ xíni̱ na̱ saʼa̱ iin na̱yivi na̱ ko̱ó kua̱chi nuu̱ na̱ néʼe chúun, ki̱ʼa jaá ni nduʼu̱ ni̱ sinu̱ ini nduʼu̱ jánaʼa̱ ndu̱ ña̱ ndaa̱ saʼa̱ Ndio̱s nuu̱ na̱yivi.

Jáchi̱ kée nduʼu̱ tátu̱ʼun ni̱ kee Jesús. Nuu̱ Tu̱ʼun Ndio̱s kachian ña̱ Jesús ‘kúú ta síʼa ndaa̱ kuendá sa̱ʼá ña̱ ni̱ xini ra, ta káʼa̱n ra ndinuʼu ña̱ ndaa̱ʼ (Apocalipsis 3:14). Jáchi̱ míí Jesús ni̱ kachi ña̱ ni̱ ja̱náʼa̱ ra kivi̱ tatá ra nu̱ú na̱yivi, ta ni̱ kisi ra ‘já ni̱ ka̱stu̱ʼun ra ña̱ ndaa̱ʼ saʼa̱ Ndio̱s nu̱ú na̱yivi (San Juan 17:26; 18:37). Sa̱ʼá ña̱yóʼo na̱ miía̱ndaa̱ ndisa ndíko̱ Cristo kánian kachúun na kivi̱ Jeová Ndio̱s ta jánaʼa̱ na̱ kivi̱ yóʼo nuu̱ java ka̱ na̱yivi. Ta ña̱yóʼo kía̱n ndíʼi ini nduʼu̱ na̱ testigo Jeová kée ndu̱.

• ¿Ndiva̱ʼa ni̱ ka̱sáʼá nduʼu̱ Na̱ jákuáʼa Tu̱ʼun Ndio̱s naní ndu̱ na̱ testigo Jeová?

• ¿Nda̱ ndá ama ví ni̱ ka̱sáʼá ndóyi na̱ testigo Jeová?

• ¿Ndá yoo kúú testigo Jeová kúnu̱ú chááka̱ nuu̱ ndiʼi na?