Yehowa Sakse Ni ngu ai gaw nawku htung nnan a mying re, nga nna masha law law shadu ma ai. Raitim, lai wa sai shaning 2,700 jan hta, teng man ai Karai Kasang gaw shi a mayam ni hpe nye a “sakse ni” ngu nna tsun ai. (Esaia 43:10-12) 1931 ning du hkra anhte hpe Chyum Jawng Ma Ni nga nna masha ni chye ma ai. Yehowa Sakse Ni ngu ai amying hpe anhte hpa majaw hkam la ai kun?

Ndai amying gaw anhte a Karai Kasang hpe madun dan ai. Shawng nnan ka ai Chyum Laika madung hta, Yehowa ngu ai Karai Kasang a amying 7,000 lang daram lawm ai. Chyum Laika law law hta, Karai Kasang a amying Yehowa ngu ai shara hta, Madu shing nrai Karai Kasang nga nna galai bang kau ma ai. Karai Kasang gaw Mawshe hpe Yehowa ngu ai amying gaw, “htani htana na nye a amying rai nga li ai” ngu nna tsun ai. (Pru Mat 3:15) Dai hku tsun nna, shi gaw kaga karai shaje ni hte nbung ai lam madun wa ai. Karai Kasang a chyoi pra ai amying hpe hkam la lu ai majaw anhte arawng la ga ai.

Ndai mying gaw anhte a lit hpe madun dan ai. Masha law law gaw, Yehowa hpe kamsham ai lam madun dan wa ma ai. Dai gaw ding hpring ai Abela kaw na hpang ai re. Abraham, Sara, Mawshe, Dawi hte kaga masha law law gaw “law la ai sakse ni” hta lawm ma ai. (Hebre 11:4–12:1) Mara n nga ai masha a matu, tara rung hta sakse hkan ya ai zawn, Karai Kasang hte seng ai teng man ai lam hpe, masha ni chye hkra galaw na ngu anhte myit daw dan da ga ai.

Anhte gaw Yesu a kasi hpe hkan shatup ai. Chyum Laika hta Yesu hpe, “kangka re ai hte teng man ai sakse wa” ngu nna tsun da ai. (Shingran 3:14) Yesu shi nan mung, ‘na a mying ning sang hpe shachye shachyang mase ai’ ngu tsun nna, ‘teng man ai maga de sakse hkam’ wa ai. (Yawhan 17:26; 18:37) Dai majaw, Hkristu a hpang hkan ai ni gaw, Yehowa a amying hpe hkam la nna, kaga masha ni chye hkra galaw ra ai. Dai hpe Yehowa Sakse Ni shakut nna galaw nga ma ai.

• Chyum Jawng Ma Ni gaw Yehowa Sakse Ni ngu ai mying hpe hpa majaw hkam la ma a ta?

• Mungkan ntsa hta Yehowa a sakse ni nga ai kade daram na sai kun?

• Yehowa a kaba htum Sakse gaw kadai ta?