كوپ ادام ەحوبا كۋاگەرلەرىن جاڭادان پايدا بولعان ٴ‌دىن رەتىندە قابىلدايدى.‏ الايدا 2700 جىلدان استام ۋاقىت بۇرىن جالعىز شىنايى قۇدايدىڭ قىزمەتشىلەرى دە «كۋاگەرلەر» دەپ اتالعان (‏يشايا 43:‏10—‏12‏)‏.‏ 1931-‏جىلعا دەيىن ٴ‌بىز كيەلى كىتاپ زەرتتەۋشىلەرى دەگەن اتپەن بەلگىلى بولدىق.‏ ٴ‌بىراق كەيىننەن ەحوبا كۋاگەرلەرى دەپ اتالا باستادىق.‏ بۇعان نە سەبەپ بولدى؟‏

بۇل اتاۋ قاي قۇدايعا قىزمەت ەتەتىنىمىزدى كورسەتەدى.‏ ەجەلگى قولجازبالاردان كورىنەتىندەي،‏ قۇدايدىڭ ەحوبا دەگەن ەسىمى كيەلى كىتاپتا مىڭداعان رەت كەزدەسەدى.‏ كوپ اۋدارمالاردا بۇل ەسىم جاراتۋشى يە نە قۇداي دەگەن سوزدەرمەن الماستىرىلعان.‏ الايدا جالعىز شىنايى قۇداي مۇسا پايعامبارعا ٶز ەسىمىن اشىپ،‏ بىلاي دەگەن:‏ «مەنى سەندەرگە اتا-‏بابالارىڭنىڭ قۇدايى،‏ ىبىرايىمنىڭ،‏ ىسقاقتىڭ،‏ جاقىپتىڭ قۇدايى ەحوبا جىبەردى،‏—‏ دەپ ايت.‏ ماڭگى باقي مەنىڭ ەسىمىم وسىلاي بولماق» (‏مۇسانىڭ 2-‏جازباسى 3:‏15‏)‏.‏ وسى ەسىمى ارقىلى ەحوبا قۇداي ٶزىن بارلىق جالعان قۇدايلاردان ەرەكشەلەدى.‏ ٴ‌بىز قۇدايدىڭ كيەلى ەسىمىمەن اتالۋدى مارتەبە سانايمىز.‏

بۇل اتاۋ قانداي ٸس اتقاراتىنىمىزدى كورسەتەدى.‏ ٵبىل ەسىمدى ادال كىسى جانە ودان كەيىن ٶمىر سۇرگەن باسقا دا كوپتەگەن ادامدار عاسىرلار بويى ەحوبا قۇدايعا دەگەن سەنىمدەرى جايلى كۋالىك ەتكەن.‏ مىسالى،‏ نۇح،‏ ىبىرايىم،‏ سارا،‏ مۇسا،‏ ٴ‌داۋىت جانە تاعى باسقالارى «بۇلت ىسپەتتى وسىنشاما كوپ كۋاگەردىڭ» قاتارىندا بولعان (‏ەۆرەيلەرگە 11:‏4—‏12:‏1‏)‏.‏ كۋاگەر بولعان ادامنىڭ سوتتا جازىقسىز ادامدى قورعاپ كۋالىك بەرەتىنى سياقتى،‏ ٴ‌بىز دە قۇداي جايلى شىندىقتى پاش ەتۋگە بەلدى بەكەم بۋدىق.‏

ٴ‌بىز يسا پايعامبارعا ەلىكتەيمىز.‏ كيەلى كىتاپتا ول «ادال دا شىنايى كۋاگەر» دەپ اتالعان (‏ايان 3:‏14‏)‏.‏ يسا ادامدارعا قۇدايدىڭ «ەسىمىن اشقان» جانە ٵردايىم ول جايلى شىندىقتى ايتىپ،‏ «كۋالىك ەتكەن» (‏جوحان 17:‏26؛‏ 18:‏37‏)‏.‏ سول سەبەپتى يسانىڭ شىنايى ٸزباسارلارى ەحوبانىڭ ەسىمىمەن اتالىپ،‏ ونى وزگەلەرگە جاريالاۋلارى كەرەك.‏ ەحوبا كۋاگەرلەرى وسىلاي ەتۋگە تىرىسادى.‏

• كيەلى كىتاپ زەرتتەۋشىلەرى نە سەبەپتى ەحوبا كۋاگەرلەرى دەپ اتالاتىن بولدى؟‏

• ەحوبا قۇدايدىڭ قىزمەتشىلەرى ول جايلى قاشاننان بەرى كۋالىك ەتىپ كەلەدى؟‏

• ەحوبانىڭ ەڭ ۇلى كۋاگەرى كىم؟‏