DISÁ 2
Mukonda Diahi a tu Ixana tu Jimbangi ja Jihova
Athu avulu a banza kuila o Jimbangi ja Jihova, dijina dia ngeleja ia ubhe. Mu kiki, ku 2.700 dia mivu ku dima ndenge, exana o jiselevende ja Nzambi ia kidi imoxi’élele kála “jimbangi” jê. (Izaia 43:10-
Kiki, kilondekesa o Nzambi ietu. Ia lungu ni isoneku iokulu, o dijina dia Nzambi Jihova, dimoneka jimidi ja veji mu Bibidia. Mu ji Bibidia javulu a lungulula o dijina didi, iá a soneka-mu Ngana, mba Nzambi. Kienhiki, o Nzambi ia kidi ua dilombolola kua Mozé, mu dijina dia Jihova, kioso kiambe: “Didi diene o dijina diami di xalela-ku.” (Makatukilu 3:15) Mu kiki, muéne ua di tungula ku jinzambi joso ja makutu. Tu di zangeleka mu kuambata o dijina dikola dia Nzambi.
Kiki kilombolola o kikalakalu kietu. Athu avulu m’ukulu, mu kumateka ni muthu ua fiiele Abele, ua londekesa o kixikanu kiê kua Jihova. Mu jihama javulu, Noué, Mbalahamu, Sala, Mozé, Davidi, ni a mukua, a bhanga mbandu ku “kifuxi kionéne kia jimbangi.” (Jihebeleu 11:4–12:1) Kála o muthu u kala mbangi phala ku zokela muthu kale ni kikuma mu inzo ia kufundisa, kiene kimoxi, tua mesena kiavulu ku ijidisa o kidi kia lungu ni Nzambi ietu.
Tua mu kaiela o phangu ia Jezú. O Bibidia i muixana “mbangi ia fiiele ia kidi.” (Dijingunuinu 3:14) Jezú uambe kuila muéne ‘uejidisa o dijina dia Nzambi,’ iú ua ‘bhana umbangi ua kidi,’ ua lungu ni Nzambi. (Nzuá 17:26; 18:37) Kienhiki, o akaiedi a kidi a Kristu a tokala kuambata o dijina dia Jihova, ni ku di ijidisa. Kiki, kiene o kikalakalu kia mu bhanga o Jimbangi ja Jihova.
-
Mukonda diahi o Adilongi a Bibidia a solo ku a exana Jimbangi ja Jihova?
-
Jihova uala ni jimbangi mu ixi, tundé thembu kuxi?
-
Nanhi o Mbangi ia dikota ia Jihova?