Bantu mingi kekanisa ti Bambangi ya Yehova kele nkumbu ya dibundu mosi ya yimpa. Nzokande, bamvula kuluta 2700, Nzambi ya kedika bokidilaka bisadi na yandi “bambangi.” (Yezaya 43:10-12) Tii na mvula 1931, bavuandaka bokidila beto Banlonguki ya Biblia. Kansi, samu na yinki beto kumaka bokudulua Bambangi ya Yehova?

Nkumbu yango kemonisaka nani kele Nzambi ya beto. Na bamaniskri ya ntama ya Biblia, nkumbu ya Nzambi, Yehova, kena kumonana mbala kana 7 000. Na bambangudulu mingi ya Biblia, na kisika ya nkumbu yango, bametulaka nde batitre, na kifuani Mfumu to Nzambi. Nzokande, Nzambi ya kedika kukimonisaka yandi mosi na Mose na nkumbu na yandi mpenza, Yehova, mpe yandi tubaka mutindu yayi: “Yina nde nkumbu ya munu samu na mvula na mvula.” (Kubasika 3:15, NWT) Na mutindu yina, yandi kikusuasikisaka na banzambi nionso yankaka ya luvunu. Kubokudulua na nkumbu ya nlongo ya Nzambi kele lukumu mpenza samu na beto.

Nkumbu yango kemonisaka yinki kele kisalu ya beto. Kubanda na Abele, muntu ya kukuikama, yau kele na mulongo ya yinda ya bantu ya ntama bayina samunaka ti bau kendiminaka Yehova. Na manima ya bamvula, Noa, Abrahami, Sara, Mose, Davidi, mpe bantu yankaka kotaka na mulongo ya ‘dituti ya nene ya bambangi.’ (Baebreo 11:4–12:1) Mutindu kaka muntu kepesaka kimbangi na tribinale samu na muntu yina kele na diambu ve, beto diaka beto kele na luzolo ya kutubila bantu kedika metala Nzambi.

Beto kelandaka kifuani ya Yesu. Na Biblia, Yesu mebokudulua “temwe ya kieleka.” (Kusonga 3:14) Yesu tubaka yandi mosi ti yandi ‘zabisaka nkumbu ya Nzambi’ mpe yandi ‘pesaka’ ntangu nionso ‘kimbangi samu na kedika’ metadila Nzambi. (Yoane 17:26; 18:37) Yau yina banlonguki ya kedikakedika ya Klisto fuanaka mpe kubokudulua na nkumbu ya Yehova mpe kuzabisa bantu nkumbu yango. Yau yina diambu Bambangi ya Yehova kesalaka ngolo bakokisa.

• Samu na yinki Banlonguki ya Biblia mekumaka kobokudulua Bambangi ya Yehova?

• Kubanda yinki ntangu Yehova kele na Bambangi awa na ntoto?

• Nani kele Mbangi ya Yehova yina meluta Bambangi nionso?